Milton Ponson di Resilient Worlds International:
ORANJESTAD (AAN): E grupo local di Resilient Worlds International presidi pa e conocido Milton Ponson, a duna un comentario riba e caso di Helicopter cu Gobierno ta lease pa cu uso di Cuerpo Policial na Aruba. Specificamente debi na e hecho cu ultimo dianan a sali na cla cu e piloto Carlos Eduardo Restrepo Osorio a entrega su mes na oficialnan di Drug Enforcement Administration (DEA) di Merca pasobra el a wordo señal di a transporta 450 kg di cocaina usando un di e Helicopternan di e compania, cu ta lease e Helicopter actual di Polis cu Aruba.
Ponson a splica cu e polemica a cuminsa, ora cu a sali na cla cu riba potretnan di archivo di Gobierno mes unda ta mira e firmamento di contract na 2019 bao mando di Ministro Andin Bikker, ey ta mira cu ta mesun piloto aki ta firmando e contract aki cu Aruba.
A base di loke a sali publica na Colombia den e corant di mas grandi di El Tiempo, a mustra cu e piloto aki no a djis entrega su mes pasobra ta involucra den narcotrafico y a admiti culpabilidad, y hunto cu su abogado a bay Merca y entrega su mes. Pero tambe cu e compania aki tabata presta servicionan pa e campaña di Gustavo Petro (Presidente electo di Colombia), y den cual yen di iregularidad a wordo señala.
E president di Resilient Worlds, a bisa cu e compania di Helicopter aki, den pasado y den mesun periodo cu Gobierno di Aruba mester a haci su ‘due diligence’ pa wak si e empresa aki tin reputacion menos bunita, como cu na Colombia tur compania di aviacion tin di haci bon background check, como cu ta conoci cu den pasado ta hopi compania chikito di aviacion a presta nan mes pa yuda narcotraficantenan. Esey a socede, pero riba henter e destaho publico na 2019 tin hopi pregunta habri y con na final e compania aki a logra haya contract cu Gobierno.
Decision di Cuerpo Policial: Basa riba informacion cu a sali den prensa na Colombia, awor na Aruba e Alto Comisario Ramon Arnhem a emiti un Korpsmededeling di un solo frase, bisando cu te cu proximo aviso, e uso di Helicopter di Polis lo no wordo usa.
Ni tres ora despues, Ministro Rocco Tjon a pone conferencia di prensa pa bisa cu Gobierno a manda indicacion na Polis pa hala aden e decision ey, y cu servicio di Helicopter lo wordo reanuda.
Diamars mainta por nota cu keto bay Polis no a hala e ordo aden. Loke ta resaltando aworaki, mirando tur e publicacionnan saliendo y cu autoridad competente a pidi e compania envolvi pa suministra tur documento y constancia di nan actividadnan di administrador desde 2019 pa awor 2022, pa haya sa exactamente cu ki tipo di negoshi ta wordo haci aki, y ki servicio a wordo presta na campaña electoral di Petro, y ki clientela e negoshi aki tin.
Segun Milton Ponson, e hecho cu e piloto Restrepo Osorio den pasado tabata accionista y por a firma e contract cu Gobierno y tur ta involucra, a bira ora pa Gobierno tuma decision y cancela e contract. El a bisa cu e contract ta poni pa vence na April 2024.
“Pero mirando e embergadura di e problema, un piloto a admiti culpabilidad di narcotrafico pa usa un di e avionnan di e compania aki pa transporta 450 kg., involucra den yen di servicionan presta na campaña electoral di presidente electo di Colombia unda tin hopi interogante, awor no por papia mas di un compania cu tin un reputacion intachable,” Ponson a bisa.
El a indica cu KPA y Sindicato SPA corectamente a indica cu di Gobierno sigui haci uso di servicio di e compania dudoso aki, ta bay atacha reputacion di Cuerpo Policial di Aruba pa cu combati narcotrafico.
“A bira ora pa Gobierno tuma e decision y cancela e contract, sino fono. Pasobra si nan no hacie, Gobierno di Aruba ta bay admiti cu no tin problema pa sigui traha cu hendenan cu abiertamente awor ta hinca den problema no solamente pa narcotrafico usando avionnan di e compania, pero yen acusacion pisa y complicacion pa cosnan iregular cu a tuma lugar den prestacion di servicio di campaña electoral di Petro, y hopi mas alegacion cu ta bay bek te na 2019.”
Awor cu Ministro Rocco Tjon a bisa cu no tin problema pa sigui haci uso di servicio di e compania, ta practicamente un bofta den cara di Cuerpo Policial, un bofta den cara di pueblo, y otro prueba cu ora Gobierno ta cumpli cu nan lo para pa integridad, den realidad ta otro cos, mas ainda cu awor ta reputacion di henter Aruba ta den wega y Gobierno no kier haci algo al respecto y haci lo corecto pa cancela e contract aki.
