Ministro a bishita Scol Basico Xander Bogaerts riba prome dia di scol

ORANJESTAD (AAN): Diahuebs tabata prome dia di scol, y specialmente pa esaki, Ministro Endy Croes a bishita diferente scol rond di Aruba.

   E mainta a cuminza cu bishita na Scol Basico Xander Bogaerts na San Nicolas. E dignatario a ricibi un caluroso bonbini pa cabesante nobo di Xander Bogaerts señora Nadia Maduro, alumno- y docentenan di e scol.

   Presente na e mainta special aki tabata “staffunctionares” di DPS Señora Morela Dirks y Señora Marylou Maduro. E ceremonia na scol a cuminsa cu canto di nos Himno Nacional Aruba Dushi Tera, sigui pa Minister Endy Croes cu a hiba palabra y a motiva e alumnonan pa haci nan maximo esfuerzo na scol.

   Alumnonan scucha di e docentenan, puntra ora bo no ta compronde algo y sigui bo soño. Enseñansa ta hopi importante pa e desaroyo profesional y personal di nos hobennan. Enseñansa ta e yabi pa forma ciudadano competente den nos comunidad y asina hunto yuda contribui na e progreso di Aruba.

   Ademas di esaki, Minister Endy Croes ta desea tur maestro hopi pasenshi, forsa, amor y sabiduria pa e aña escolar nobo. Danki pa contribui den e desaroyo di Pais Aruba. Tambe, a presenta henter e staf di e scol na e alumnonan presente. Minister Endy Croes a gradici cabesante saliente Señora Ustell Cornet pa su amor, dedicacion y profesionalismo den e veld di enseñansa. Señora Cornet ta baha cu pensioen bon mereci.

   Alavez Minister Endy Croes ta desea cabesante nobo señora Nadia Maduro hopi sabiduria pa guia e scol. Pa conclui, Minister Endy Croes a enfatisa cu su portanan ta habri, ki ora cu tin cualkier inkietud ban resolve hunto na bienestar di nos alumnonan.