Inteligencia Artificial crucial den un di e retonan mas grandi di mundo
*Compilacion di informacion ta bira central pa scapa bida di hende
*Impacto di Costo di Long Covid ta topa cu cambio den naturalesa
ORANJESTAD(AAN)—Compilacion di cifranan ta uno di e encargonan mas importante cu mundo a ricibi di dos reto cu a uni contra e ser humano durante ultimo añanan.
Na 2020 hende a wordo confronta cu e atake di Covid-19, cu a exigi actuacion sumamente rapido di mundo cientifico pa actua.
Sinembargo, no ta solamente riba tereno medico pero sigur riba tereno di Inteligencia Artificial mundo mester a a haci uso di camindanan nobo cu ciencia a crea pa asina den compilacion di cifranan por a enfrenta e enemigo.
Covid-19 no ta e unico motibo cu hende mester di cifra den e era moderno, cu a mira por ehempel edad di hende subi a base di ciencia cu ta tene hende na bida y ta nifica tambe exigencianan nobo continuamente pa tur tereno cu ta atende cu salud di hende.
E reto grandi cu hende tin actualmente ta cambio di clima, cu ta expone hende na e necesidad pa compila cifranan pa asina mundo por actua a base di contestanan cu mester wordo duna na retonan grandi.
Cual ta e paisnan cu mas lo wordo afecta dor di cambio di clima y con esaki lo tuma lugar?
E no ta un asunto solamente pa cual lugar tin mas cuminda pa come of ta menos expone na por ehempel desastre causa pa condicionnan di tempo, manera horcan.
E impacto di clima riba salud di hende ta sumamente grandi y como tal e tin efecto directo riba e cuido medico cu mester duna na gruponan mas afecta pa motibo di nan enfermedad pero tambe pa motibo cu nan ta biba e lugarnan caminda cambio di clima tin resultado mas severo.
Sistemanan digital na e momentonan aki mester entrega na ciencia informacionnan continuo cu ta drenta riba e forma cu cambio di clima ta afecta salud di hende y e impacto cu e tin ariba cada grupo di hende cu cierto tiponan di enfermedad.
Pa cada enfermedad e impacto di clima ta mas importante y cuido medico mester ta prepara pa esaki.
Informacionnan cu DIARIO ta ricibi y ta prepara pa presenta na su lectornan ta papia di e hecho cu hende, gobiernonan y companianan di seguro tin encargo sumamente pisa pa vigila e salud di hende den e cambio di clima.
Den preparacion di cifranan dor di gobiernonan y companianan di aseguro entre otro, mester tene cuenta loke ya ta conoci riba e aumento di costo di cuido medico den e temponan venidero.
DIARIO lo presenta na su lectornan informacion valioso riba e topico aki pa asina hunto por traha riba un realidad sumamente importante den e mundo di cuido di salud di hende y asina cuido medico.
