ORANJESTAD (AAN): Recientemente Minister di Enseñansa y Deporte Endy Croes a asisti na e concierto di fin di aña Nos Deseo di Scol di Musica Rufo Wever.
E bunita presentacion musical aki di e hobennan talentoso di Scol di Musica Rufo Wever a tuma luga na Cas di Cultura. E aña aki Scol di Musica Rufo Wever ta celebrando 70 aña di existencia.
Scol di Musica Rufo Wever ta duna les di canto y diferente instrumento na Cas di Cultura, entre otro, les di piano, les di violin, les di guitara, les di percusion, les di fio y les di trompet.
Meta principal di Scol di Musica Rufo Wever ta pa promove musica y tur otro arte cu tin algo directamente di haber cu ne y en particular pa duna enseñansa den e artenan aki.
Minister Endy Croes ta felicita Scol di Musica Rufo Wever cu nan tremendo presentacion di fin di aña, alavez ta gradici nan pa contribui na e desaroyo musical di Pais Aruba durante 70 aña.
