Parlamentario Shailiny Tromp-Lee (MEP):
ORANJESTAD (AAN): Durante reunion publico, tratando Presupuesto di Pais Aruba pa aña 2024, mi a duna e aspecto di infrastructura den enseñansa tambe su atencion. Mi a haci un pregunta di follow up encuanto diferente scol wardando riba un edificio adecuado of nobo.
Prome cu mi trata e pregunta y remarkenan encuanto infrastructra den enseñansa cu mi a haci durante reunion publico, mi kier informa cu Parlamento a aproba mediante Presupuesto Supletorio 2023 construccion di un scol na Paradera y aplicacion di un HAVO/VWO na Playa. Gobierno ta bay construi un Juliana/Mavo na Paradera pa un suma di Afl. 6.7 miyon y lo inverti den ampliacion di HAVO/VWO Mon Plaisir na Playa pa Afl. 2.6 miyon.
Durante reunion diaranson ultimo, mi a pidi Minister Croes pa elabora tambe riba otro scolnan cu ta pendiente hopi tempo pa renobacion, construccion, ampliacion of pa un edificio apto pa enseñansa manera Reina Beatrix, Frere Bonifacius, Ceque College y Maria College. Mi a pidi Minister pa presenta e plannan a largo plaso riba tereno di infrastructura den enseñansa.
Segun Minister Croes e la reuni over Frere Bonifacuis cu SKOA 2 luna pasa y tin e pensamento pa por renoba e edificio di ex Prinses Amalia School pariba di Elmar Oranjestad. A keda di haci un assesment actualisa kico esaki por costa y sondea e posilidad di ehecucion.
Pa loke ta trata Reina Beatrix, minister a informa cu nan a muda desde augustus 2022 pa ex edificio di Scol Paso pa Futuro. A verf e school aki completamente, a cambia e cura y Reina Beatrix a muda for di e edificio na Seroe Blanco. Tambe a entrega e trailernan na YMCA Dakota y e scol completo a bay hunto bou di un solo dak. Segun Minister a reuni cu e hoofd y nan ta asina contento cu e edificio aki cual porcierto tin hasta nan gymzaal y nan no kier sali mas di eyden.
Pa Ceque College e plannan ta grandi. Intencion ta pa traha un scol nobo pa nan na Noord. Tereno ta keda pariba di Scol Felipe B Tromp na Noord y e dossier ta traha. Awor mester percura pa e fondonan necesario pa haci esaki un realidad.
Pa loke trata Maria College nos por a compronde cu e studiante/klasnan cu tabata den e dependance na VAD gebouw a bay na Maria of La Salle College.
