HOH a videoclip pa fin di aña hunto cu Ataniro

ORANJESTAD (AAN): Pa Horacio Oduber Hospital ela bira un trend cu ta saca cancion propio y e aña aki no ta un excepcion.

Durante henter aña mas di 1100 colega ta bini hunto pa brinda e miho cuido posibel na nos pashentnan y bishitantenan y den esaki demostra nan profesionalismo riba tereno di cuido medico. Y awo durante fin di aña nan ta demostra cu banda di ta profesional den cuido nan tin talento den baile y entretenimento tambe. E aña aki Hospital a uni cu artista local Ataniro y hunto a saca un tremendo cancion cu dushi ritmo pa Aruba completo canta, baila, sak bay abou y gosa di bida.

   Team di comunicacion a acerca Ataniro algun luna pasa, unda a sinta y a conte di e vision pa e aña aki, esta “unda cu bo bira, hende di Hospital bo ta mira”. Tambe e team a bisa Ataniro cu e aña aki ta desea algo cu hopi zjeito pa hende por baila y gosa di bida. Ataniro no a duda y e drenta studio unda e cu Rygel Isabella a compone, aregla y produci e tremendo cancion pa Hospital. Un cancion cu alfinal tin letranan manera “Di San Nicolas te na Playa, den fiesta of den caya, Nos di HOH semper t’ey!”
   Pa loke ta e videoclip a traha hunto cu Gleison Mateus y e resultado ta unico ilustrando creatividad, ambiente, colegialidad y felicidad. Banda di esey por mira diferente localidad di nos dushi Aruba, esta San Nicolas, Playa, Casibari, Bubali Plas y Hospital mes pero den un bachi mas festivo. A lanza e clip na comienso di siman riba rednan social y tambe youtube y e acogida ta tremendo.