Defensa di Husticia na democracia durante eleccion mester sigui awe ---- *24Ora.com a permiti atentado directo contra dos Minister di Aruba --- *A uni cara di Prome Ministro na curpa di prostituta den accion sexual
ORANJESTAD (AAN) — Tin varios forma pa destrui un hende. Na paisnan dictatorial manera Venezuela y Rusia, uno di e metodonan pa habri caminda pa destrui un persona, ta difamacion di su bon nomber.
Ministerio Publico mester actua awor contra e hecho cu e periodistanan Andrade y Paskel, a trata di asesina e bon nomber y reputacion di Prome Ministro Evelyn Wever-Croes y di Ministro di Asuntonan Financiero Xiomara Maduro dor di crea imagennan den cual nan ta wordo presenta como prostituta.
Uno di e imagennan mas baho cu mente perverso por crea, ta sin duda e imagen pornografico den cual ta mira parti intimo di un muher haciendo sex na forma vulgar. A reemplasa e imagen original cu cara di Prome Ministro Wever-Croes.
Esaki ta djis uno di e coleccion cu a keda presenta di imagennan cu caranan di Prome Ministro Wever-Croes y Ministro di Asuntonan Financiero na imagennan y y caricaturanan di prostitutanan na situacionnan sexual sushi.
24 Ora.com mester hustifica su mes enfrente Ministerio Publico pa e hecho cu e ta permiti e dos hombernan uza su nomber y compania pa destrui e bon nomber y reputacion di dos gobernante di e pais den presentacionnan askeroso contra moral di Aruba.
Andrade y Paskel ta hustifica nan atentado contra e Ministronan cu e nivel di Radio Rochela, cu nunca a yega na e lodo den cual Andrade y Paskel ta comberti medio di comunicacion y asina ta habri porta directamente pa terorismo periodistico di cual ley ta proteha e ciudadano.
Ministerio Publico di Aruba tin e deber pa awor cuminsa un investigacion contra e produccionnan di Andrade y Paskel, cu ta promove terorismo periodistico na Aruba ya cu miedo ta wordo crea directamente pa personanan pa bay contra Paskel, Andre y tur cu por ta sconde nan tras, mescos cu nan pensamentonan, nan interesnan y obviamente hasta e partido politico na cual nan ta tene.
E publicacionnan di e dos hombernan, cu ta uza nomber di periodismo, ta wordo autorisa dor di 24 ora.com cu asina ta asumi responsabilidad directo pa terorismo directo cu ley no ta permiti.
Durante eleccion 2021 tabata Ministerio Publico y Corte di Husticia di Aruba, cu a sigura ley a wordo aplica pa sigura democracia na Aruba.
Durante eleccion 2021 Husticia na Aruba a asumi su responsabilidad pa ley ta base di Aruba, caminda no por pone presion riba un ciudadano pa e bay vota.
Con sagrado e derechonan y libertad di expresion di Pueblo ta, a keda hancra den decisionnan den Corte, cu a bay contra politiconan di AVP pa haya informacion di votadornan pa evita cu presion por wordo ehecuta riba nan.
Huez tambe a bay contra pa uza voto secreto di Aruba den un caso pa yega na reconteo y a indica cu prueba cu AVP a presenta tabata contra e ley cu mester garantisa democracia, mester evita corupcion pa medio di manipulacion di e votador.
Den e publicacionnan di caranan di Prome Ministro Wever-Croes y Ministro di Asuntonan Financiero pa portretnan pornografico, Ministerio Publico tin e deber pa inmediatamente habri investigacion penal, manera ley ta haci posibel.
Mester determina kende ta productor, si tabata tin hende cu a paga Paskel y Andrade pa e presentacion y tambe ta castigabel segun ley.
Finalmente 24 ora, com cu a permiti pa e wordo uza pa plama e productonan den cual a uni caranan di e dos Ministronan na curpa di prostitutanan den accion, tambe segun Ley mester wordo persigui.
Difamacion ta uno di e hermentnan mas peligroso contra hende y ta crea temor di otro hende tambe pa bay contra cualkier persona, cu por uza medionan di comuncacion pa mata nan personalidad real y abusa di nan cara pa ganashi personal.
DIARIO awe lo duna prueba con libertad di Aruba ta na peligro si autoridad no actua.
