Remarke di Ministerio Publico riba sentencia Caso Oleander
ORANJESTAD (AAN): Den sociedad, comunidad y e ciudadano mester por confia cu ambtenaarnan ta integro y ta trata tur hende igual, sin cu nan ta bay saca ventaha personal y duna cierto hende un trato cu handschoen di felpa.
Corte den Prome Instancia na Aruba a dicta sentencia siman pasa den e caso penal contra e sospechoso di inicial M.S.G.
Sospechoso G. tabata wordo acusa di, como ambtenaar di Departamento di Impuesto, a haci su mes culpable di a tuma soborno. E sospechoso tabata percura pa acelera pagonan di restitucion dor di duna cierto personanan trato preferencial. Despues di pago di e restitucion, e sospechoso tabata pidi pa un contribucion monetario pa e servicio extra cu el a duna. E investigacion aki, cu Landsrecherche a cuminza na 2022, ta conoci como Caso Oleander.
Huez a condena G. pa un castigo di trabao di 140 ora y un castigo di prison condicional di un luna. Fiscal di husticia a exigi tambe pa G. wordo saca di e derecho pa traha como ambtenaar pa un periodo di tres aña. Huez a mustra comprension pa e exigencia aki di fiscal, pero no a sigui cu ne, considerando e circunstancianan personal di e sospechoso, kende mientrastanto a perde su trabao na DIMP tambe.
Ministerio Publico lo sigui bringa corupcion. E ciudadano mester por confia cu ambtenaarnan ta integro y ta trata tur hende igual. Ora un ambtenaar saca ventaha personal dor di duna cierto personanan trato preferencial, e confianza di ciudadanonan den integridad di ambtenaarnan ta wordo atacha. Net precisamente di un ambtenaar por expect cu e ta actua na un manera integro y ta tene su mes na ley.
