ORANJESTAD (AAN): Manera cu DIARIO a trece dilanti caba den su relato di Corte y e sentencia di Hof, ta asina cu Corte Superior a duna instruccion na Ministerio Pubico recientemente pa persigui dos agente policial riba sospecho di homicidio.
Esaki ta ora cu e dos agentenan aki coriendo patruya e anochi ey, a bay duna asistencia na cas di un famia, pasobra nan tata a yega cas burachi y tiki fastioso.
E asistencia simple aki a desemboca cu Polis a los tiro y mata e persona. Hof ta haya cu e Polisnan tin di wordo persigui.
Relaciona cu e instruccion aki, Ministerio Publico lo cita e polisnan pa presenta dilanti Huez. E caso lo bin dilanti Corte dentro di un tempo.
E decision di Corte Superior tin di haber cu un keho segun articulo 15 di Buki di Procedimiento Penal di parti di famia di un persona cu a perde su bida despues di a worde tira pa polis riba 28 di september 2020.
LandsRecherche a cuminza un investigacion penal esten, for di cual a sali (na opinion di Ministerio Publico) cu e polisnan envolvi a actua den defensa propio. Siguientemente fiscal di husticia a seponeer e caso.
Corte Superior a dicidi awor cu e punto di salida mester ta semper cu un caso mester worde en principio hiba dilanti Huez si ta trata di sospecho di un hecho castigable hopi grave caminda un persona a fayece. Pues esey ta loke ta bay pasa awor cu citacion di e dos polisnan.
Ministerio Publico ta sigui riba e posicion cu ta trata di defensa propio.
