ORANJESTAD (AAN): Pa prome biaha Minister di Finansa ta bay presenta un 'Voorjaarsnota' den cual Parlamento na comienso di aña caba ta worde informa di cambionan den Presupuesto
E siman aki Minister Maduro di Finansa a reuni cu Departamento di Finansa pa asina repasa e detayes di locual ta bira e prome 'Voorjaarsnota,' un 'Nota di Comienso di Aña' den cual Parlamento na comienso di aña caba ta worde informa di e cambionan den Presupuesto.
Te cu awor nos conoce un 'Najaarsnota,' un 'Nota di Fin di Aña' den cual Parlamento despues di mita aña ta worde informa di e cambionan den Presupuesto.
Basa riba e 'Nota di Fin di Aña' Gobierno ta presenta un Presupuesto Supletorio den cual ta pidi Parlamento aprobacion pa e cambionan si esaki ta necesario.
Pa duna Parlamento un bista mas tempran di e cambionan necesario den e Presupuesto di Pais Aruba, Minister di Finansa ta introduci un 'Nota di Comienso di Aña.' E Nota aki lo keda presenta den e prome mita di aña y esaki tambe lo por worde compaña pa un Presupuesto Supletorio pa pidi Parlamento aprobacion pa e cambionan. E ultimo aki ainda mester keda dicidi pa Conseho di Ministronan.
Cu introduccion di un 'Voorjaarsnota' den e ciclo presupuestario di nos Pais, Gobierno ta brinda Parlamento informacion presupuestario na mas momento den un aña. Esaki sigur ta yuda e derecho di 'budgetrecht' di Parlamento di Aruba y ta brinda mas transparencia na Pueblo riba con e fondonan publico ta keda uza pa Gobierno.
