Ministerio di Turismo contento di a contribui pa Iron Order Club Ride tuma lugar na Aruba

ORANJESTAD (AAN): E organizacion di Iron Order Motorclub Aruba en cooperacion cu Iron Order Caribbean,

a prepara un fenomenal Iron Order Bike Ride riba e isla aki, y esaki a tuma lugar Diasabra atardi cuminzando for di e parkinglot dilanti Edificio BelFin, na Departamento di DIMP.

   Loke a haci esaki mas grandi, ta e hecho cu un cantidad di miembronan di Iron Order for di Merca, demas islanan di Caribe, y hasta Suriname tabatey presente.

   Ministro di Turismo Dangui Oduber tabata presente, y tabata contento di mira cu hopi participante di Merca a bin pa asina participa.

   El a bisa cu su Ministerio ta contento pa mira cuanto Bikers a bin for di Iron Order di Merca, y nan a yega for di diferente estado.  Cada uno cu nan Jacket original di nan estado, pa asina instantaneamente bo ta mira si nan ta di e.o. Alabama, New York, New Mexico, Oklahoma, North Carolina, Texas, etc.  Tabatin di Alemania tambe presente!

   E organizacion local a organiza e evento, y ta haci esey no pa gana placa sino pa celebra Dia di Himno y Bandera, y alavez invita Bikers di exterior.  Pesey nan a acerca Ministerio di Turismo y Oficina di Turismo pa check si por duna un contribucion.  Ministro Oduber a indica cu nan ta contento di a duna un contribucion chikito pa asina yuda e organizacion den e evento costoso aki.

   E Bikernan di Merca cu a bin como turista, sigur a keda encanta cu e evento aki.  Gobierno ta contento cu e evento aki tin un impacto asina grandi.  Tin algun di e Bikernan di Iron Order cu pa prome biaha a bin Aruba.  Tur ta yuda den contribucion di economia di turismo cu nan bishita.

   Minister Dangui Oduber ta gradici “Iron Order Motorcycle Club Aruba” pa organisa e bunita “bike ride” akin a manera voluntario, danki pa yuda den e recuperacion di Aruba su turismo y economia.    Aruba ta e perla den Caribe pero ta su hendenan cu semper a sa di mustra nos bishitantenan un bon hospitalidad ta haci e tipo di eventonan aki posibel. Na mes momento a felicita tambe Camacuri bikers cu nan aniversario di 25 aña organisando bike rides na Aruba.