ORANJESTAD (AAN): Riba Dia Internacional di Cacho, Ministerio di Salubridad, Asunto Social,
Cuido di Adulto Mayor y Maneho di Adiccion ta sigui conscientisa comunidad riba e importancia di cuido responsabel di mascota. E mensahe aki ta parti di e campaña No Mas Sufrimento, Mas Doño di Mascota Responsabel.
Ministerio, hunto cu Directie Volksgezondheid (DVG), ta trahando riba un maneho pa fortalece bienestar di animal y siguridad den comunidad. E enfoke ta inclui promove responsabilidad, preveni abandono, maneha y regula animalnan riba caya conforme cu ley.
Kico ta nifica ser un doño di mascota responsabel?
Cuido y bienestar: Percura cu e mascota ta wordo bon cuida. Esaki ta inclui atencion veterinario, vacunacion y prevencion di reproduccion indesea mediante castracion of sterilisacion.
Identificacion: Percura pa e mascota tin identificacion, preferiblemente un microchip registra den un database cu informacion di contacto actualisa.
Responsabilidad den comunidad: No bandona su mascota y tene su mascota bou control pa evita cu e ta forma un peliger pa su mes, otro animalnan, comunidad y medio ambiente.
Cu e campaña aki, Ministerio ta sostene e trabou di DVG pa reduci abandono y sufrimento di animalnan. Pa logra un cambio duradero, participacion di comunidad ta esencial.
Den e siguiente simannan, Ministerio y DVG lo comparti mas informacion riba actividadnan educativo relaciona cu cuido responsabel di mascota.
Sea bo tambe un doño di mascota responsabel.
