Minister di Infrastructura Rene Herdé
ORANJESTAD (AAN): Modernisa e aparato publico, acelera proceduranan y brinda ciudadanonan un servicio mas eficiente ta forma parti di e transformacion cu Minister di Vivienda, Infrastructura, Servicio Interno y Telecomunicacion, Rene Herdé, ta boga pa mehora den e diferente carteranan bou di su responsabilidad.
E necesidad pa cambio ta grandi. Herdé a dedica atencion na conoce e realidad di cada departamento y identifica unda e proceso ta stanca. Loke cu a bin na remarke ta proceduranan anticua, un sistema digital cu mester modernisa, tin falta di personal den diferente departamento y den algun caso, un cultura caminda tuma decision a bira dificil.
Segun e minister, esaki ta parcialmente resultado di un situacion cu durante añanan no a haya e atencion necesario. Mientras tanto, necesidad di comunidad ta sigui crece: ciudadanonan ta warda pa tereno, empresarionan ta warda pa por inverti, famianan ta confronta tardansa pa construi nan cas y infrastructura publico ta exigi inversion considerabel.
Pa Herdé, e situacion no por sigui wordo atendi cu e mesun forma di traha.
“Nos mester lubida custumber y mira kico ta e miho solucion pa Aruba awo. Si mester di personal, nos ta pone personal. Si mester cambia sistema di trabou, nos ta cambia e sistema,” ta loke cu e minister a expresa.
“Nos tin pura”
Dentro di su bureau, Herdé a introduci un mensahe simpel: “Nos tin pura.” No pa salta procedimento of exigencia legal, sino pa crea un sentido di urgencia den un sistema caminda cu e ciudadano a warda demasiado tempo pa servicio.
E minister a menciona como ehempel personanan cu tin mas cu un decada ta warda riba un peticion di tereno y inversionistanan cu ta confronta tardansa prolonga pa permiso di construccion. Segun Herdé, situacionnan asina no por bira normal den un pais cu kier facilita vivienda, inversion y desaroyo economico.
Precisamente p’esey, e ministerio ta revisando proceso for di nan fundeshi: proceduranan, sistema digital, capacidad di personal y e manera cu departamentonan ta procesa y intercambia informacion.
E principio ta cu, si un cambio no ta produci e resultado desea, Gobierno mester ta dispuesto pa evalua y adapta atrobe.
Un ehempel ta e maneho pa peticion di tereno, cu recientemente a conoce diferente cambio pa acelera e proceso. Herdé a indica cu e meta no ta simplemente implementa un sistema nobo, sino logra cu e ciudadano realmente por haya tereno mas lihe, pasa pa un financiamento mas lihe y finalmente cuminsa construccion di su cas mas lihe.
“E meta ta keda mescos. Si e forma pa yega na dje no ta duna e resultado cu nos kier, nos ta cambia atrobe te ora nos haya e solucion,” segun Herdé.
Permiso di construccion: reduci tardansa significativamente
Otro proceso cu ta haya atencion particular ta entrega di permiso di construccion. Segun e minister, e tardansa actual no ta aceptabel y Gobierno ta trahando riba cambio di procedura, forma di traha, sistema y comunicacion entre e instancianan concerni.
E meta cu Herdé a pone ta ambicioso: reduci e tempo di espera pa menos cu mitad di loke ta actualmente, ta programa e cambionan necesario pa implementa gradualmente te final di aña.
E minister ta enfatisa cu su intencion no ta culpa e funcionarionan den e departamentonan. Al contrario, durante su evaluacion el a encontra profesionalnan cu ta indica abiertamente cu nan tin falta di personal, sistema, ekipo of informacion pa por cumpli cu nan responsabilidad.
Segun Herdé, e diferencia awo ta cu e señalnan aki mester conduci na accion.
Infrastructura ta exigi un plan a largo plaso
Modernisacion no ta limita na proceso administrativo. E condicion di infrastructura di Aruba ta otro ehempel di e atraso cu mester wordo enfrenta.
Minister Herdé a indica cu, basa riba calculacion disponibel, e necesidad pa rehabilitacion di e red di caminda di Aruba ta representa aproximadamente 355 miyon florin. E realidad financiero no ta permiti pa atende cu tur cos pareu y precisamente p’esey un plan ta necesario pa gradualmente recupera e atraso.
Gobierno a cuminsa cu inversionnan cu ta incorpora den presupuesto y diferente proyecto ta den preparacion of ehecucion, cu e meta pa mehora calidad di infrastructura paso a paso.
Modernisacion cu ciudadano como resultado final
E vision di Herdé ta bay mas leu cu tur e responsabilidadnan di su ministerio. Den Vivienda, e prioridad ta crea mas oportunidad y acelera e caminda pa famia logra nan propio cas. Den Infrastructura, ta recupera atraso y prepara proyecto cu Aruba tin mester. Den Servicio Interno, ta fortalece capacidad y eficiencia di e aparato gubernamental, mientras cu Telecomunicacion ta forma parti di e modernisacion necesario pa prepara pais pa futuro.
Pa Minister Rene Herdé, modernisa Gobierno no ta simplemente digitalisa un formulario. Ta cuestiona sistema cu no ta funciona adecuadamente, scucha e departamentonan, inverti den capacidad y ta dispuesto pa cambia e forma di traha ora resultado no ta suficiente.
E reto ta grandi y e atraso no por wordo elimina di un dia pa otro. Pero e direccion cu e minister ta pone ta cla: menos tardansa, mas capacidad pa tuma decision y un Gobierno cu ta move na ritmo di e necesidad cu e comunidad ta exigi.
Cu e transformacion aki, Ministerio di Vivienda, Infrastructura, Servicio Interno y Telecomunicacion ta busca no solamente atende e demanda acumula, sino pone un fundeshi mas moderno y duradero pa e manera cu Aruba lo brinda servicio na su ciudadanonan den futuro.
