Ministerio di Integridad a presenta proyectonan durante workshop ‘Towards Integrity in Aruba’

Ministro Ursell Arends:

ORANJESTAD (AAN): Dia 17 di maart 2023 a tuma luga un workshop interactivo organiza door di Universidad di Aruba, den colaboracion cu Stichting Deugdelijk Bestuur Aruba, Saxion Hogeschool, HopeAruba y Aruba Institute for Good Governance & Leadership.

  Durante e workshop ‘Towards Integrity in Aruba’ sr. Carlos Guiamo, consehero di Minister Arends, a duna splicacion di varios proyecto den ehecucion y proyecto den preparacion relaciona cu integridad gubernamental. Entre otro a elabora riba desaroyonan di corporate governance, reglanan pa dienstverleningsovereenkomsten (DVO’s/OVO) y reforma democratico. Sr. Guiamo a enfoca riba e importancia di transparencia gubernamental y tambe a duna un preview di e Active Transparency Project cu lo worde lansa pronto. Señora Ruthlyn Lindor, tambe consehero di Minister Arends, e presenta e Aruba Integriteitsstrategie (AIS), cual ta un iniciativa riba nivel nacional pa coordina y promove good (corporate) governance y integridad. Den e AIS lo fiha meta y prioridadnan nacional, plan di implementacion, evaluacion y mas.

   Despues di e presentacion di e conseheronan di Minister Arends, Bureau Integriteit Aruba (BIA) a duna un presentacion di e trabaonan y desaroyonan tumando luga door di BIA. A splica entre otro di e proceso di implementacion di Vertrouwensperonen Integriteit y Internde Onderzoekers, cual ta proyectonan cu BIA ta ehecutando. E presentacionnan di Ministerio di Integridad a worde sigui pa presentacionnan di Stichting Deugdelijk Bestuur Aruba, HopeAruba y Universidad di Aruba. Durante e parti mas interactivo por a combersa y contesta pregunta di participantenan.

   Bureau di Minister Arends ta gradici e organizadornan y e participantenan pa e oportunidad pa duna informacion, contesta pregunta y scucha pensamento y sugerencia di e ciudadanonan presente.