ORANJESTAD (AAN) – Seccion di Bijstand di Departamento di Asunto Social, a tuma nota di un cliente di nan seccion cu a opta pa acerca un medio di comunicacion splicando un situacion cu e ta pasando aden.
Acercando Jesseline Kelly, Relacionista Publico di DAS, el a bisa na DIARIO cu su departamento no ta elabora riba casonan specifico di ningun cliente, pero nan ta respeta privacidad di tur cliente.
Kelly a señala cu tin hopi aspecto cu aña aden, aña afo semper e ta bisa, por ehemplo, pa tin un bon comunicacion cu e Seccion di Bijstand, y notifica ora tin cambionan, manera: cambio di adres, of si e cliente su yiunan ta cambia di scol, comunica esaki, si e cliente ta bay afo cu vacacion, of ta wordo interna den hospital, of ta bay den exterior pa motibo di salud via AZV, si a bin un cambio den e constelacion di famia manera divorcio, of e cliente a casa, of a bay cera, si tin hende cu no ta biba cu e cliente mas den cas pero cu tambe ta forma parti di e bijstand, tur esaki mester wordo comunica na Seccion di Bijstand. Jesseline Kelly a reitera cu ta importante pa tin un bon comunicacion cu Seccion di Bijstand pa evita sancion; pa no haya sorpresa fin di luna.
El a bolbe splica cu Seccion di Bijstand ta ehecuta loke ley ta bisa. Kelly a señala cu hopi biaha hende ta pensa cu e trahado publico ta tuma decision riba su mes. “No ta asina, tur trahado di Bijstand ta ehecuta locual ley ta bisa”, el a reitera. El a agrega cu si e trahado publico no ta cumpli cu ley, tambe tin sancion p’e pasobra e ta kibrando e ley.
El a subraya cu cada rekisito chikito cu e ta splica, ta mara na un articulo, y esaki por tin consecuencia riba e suma, sea cu e ta subi of ta baha.
Jesseline Kelly a splica cu si un cliente wordo interna den hospital pa tal fecha, DAS ta hinke den e sistema y automaticamente e ley ta bisa cu despues di tanto siman mester bin un cambio. “Kico ta pasa si e cliente no bin avisa cu e situacion a cambia, despues di tanto siman e bijstand ta baha. Pesey, e cliente semper mester tin bon comunicacion cu e seccion di bijstand” Jesseline a reitera.
El a agrega cu na momento cu e cliente ta aplica pa bijstand e ta firma un acuerdo unda e ta compromete na comunica cu seccion di bijstand na tur momento. Kiermen e cliente semper mester keda corda riba e acuerdo aki. Tambe ta asina cu clientenan di bijstand cu ta huur cas di FCCA, ta yega na un acuerdo cu e fundacion pa nan retene un suma di bijstand, cual DAS no sa di dje pasobra entre e cliente y FCCA.
Locual DAS ta haya ta un carta di FCCA bisando cu tin cu retene “x” suma for di su bijstand. Locual e seccion ta sigura pa haci ta cu e suma cu ta wordo reteni no mag pasa 50% di e suma final di bijstand, Jesseline Kelly a señala.
