Advertencia di DIARIO pa cambio den sosten Hulandes a bira realidad
- Produccion local di cuminda mester stimula crecemento economico
- DIARIO a señala e necesidad pa Pueblo come den tension mundial
ORANJESTAD (AAN) Nada a cambia na mundo den e ultimo simannan di tension y mas tension y un horizonte preocupante cu a anima dirigente di Reino Hulandes y hasta Rey Willem Alexander mustra cu e momento a yega pa prepara pa situacionnan di Guera.
DIARIO a prepara Aruba cu e temponan di cambio a anuncia nan mes yh cu sigur pa loke ta trata relacionnan den Reino mester bandona e creencia, cu asistencia Hulandes no tin limite.
Den cantidad di articulonan, DIARIO a mustra con Aruba mester prepara pa e tempo di cambio cu e siman aki a wordo confirma dor di Ministro Zsolt Szabó, cu a papia di un formula nobo pa ayudo Hulandes, cu ta mara na prioridad pa Pueblo Arubano produci su propio cuminda.
Ministro Szabó den su declaracionnan con economia di e pais mester ta, a hiba Aruba na e base di un gobernacion democratico, cu na prome lugar ta percura pa Pueblo tin cuminda pa come.
Bienestar di Pueblo ta central den democracia y ta depende na prome lugar di e forma cu un comunidad di hende por alimenta su mes sin ta dependiente di factornan externo.
Den esaki e Ministro Hulandes a subraya e punto di bista democratico internacional, cu ta considera como prioridad den tur maneho e hecho cu e hende en berdad por come, bebe, haci di uzo di vivienda adecua, defende su mes contra peligro y maleza y busca su bienestar basico.
E cambio Hulandes ta encera tambe cu no ta sin mas Hulanda ta pone placa riba mesa pero cu Hulanda lo duna cierto suma cu destinacion directo pa produccion di cuminda.
Esaki ta nifica cu Hulanda ta duna e sosten financiero basico no pa haci y deshaci manera mundo local politico lo kier, pero pa cumpli directamente cu e base di democracia cu ta encera cu tin cuminda pa Pueblo come den un situacion mundial cu lo por afecta, manera DIARIO a adverti, importacion di cuminda si realmente e situacion mundial empeora.
Tempo ta e mihor maestro y tambe e mihor Huez pasobra e decision Hulandes ta hiba Aruba directamente na e maneho di e gobernante Arubano, Daniel Leo, cu a pone enfasis riba produccion di cuminda na Aruba.
E visionario Daniel Leo, cu a resolve e problema mas serio pa produccion di awa den historia moderno di Aruba, a hiba como maneho e creacion di un infrastructura cu a haci posibel pa Aruba pa medio di Cria, Pesca y Agricultura, por a sigura su cuminda produci na Aruba.
E cantidad di dam cu el a laga atras como parti di su maneho, awe ta prueba di su intento y indicacion pa por sigui traha riba e prioridad di Daniel Leo, cu Gobierno Hulandes awor ta mira como base di un economia nobo di Aruba na uno di e momentonan mas dificil cu Reino a conoce for di fin di Segunda Guera Mundial.
Manera DIARIO a adverti, Hulanda como parti di Europa y NATO mester ta prepara pa guera y mester duna su participacion financiero na e mobilizacion mundial nobo.
Despues di e anuncio di punto di bista di Gobierno di Reino manera presenta pa Ministro Hulandes Szabó. DIARIO ta den contacto cu su informantenan cu ta indica cu mester a spera e decision di Hulanda.
Si Europa y asina Hulanda tambe ta prepara pa guera, mester for di awor prepara pa Aruba por sigui come, cu pa un isla ta depende di su produccion propio, loke ta nifica segun expertonan cu Aruba mester bolbe na e maneho di Daniel Leo, cu awe tempo a duna razon.
Gobernacion Hulandes a conoce un cambio sigur despues di ultimo eleccion ora Pueblo di Hulanda a exigi pa Gobierno Hulandes atende problemanan ya existente, mientras e situacion explosivo mundial mester ta base den e compromisonan cu Hulanda ta cera cu otro paisnan den Reino, manera Aruba.
DIARIO lo sigui tene Aruba informa mientras awor sigur mester bolbe na planificacion di Daniel Leo pa economia sostene na prome lugar e produccion local di un Pueblo riba un isla rondona pa laman, cu den na momento di guera of peliger di fenomeno natural, lo topa cu problema pa importa cuminda.
Den su proximo edicionnan DIARIO sigur lo splica kico ta e responsabilidadnan gubernamental cu economia mester atende, pa asina atende cu produccion di medio financiero pa un base aceptabel di bida di e ciudadano Arubano cu ta keda central den tur maneho y na prome lugar mester por come, bebe y defende su mes contra peligronan natural of crea pa hende!
