Suceso tragico na Hulanda ta exigi atencion pa realidad di mucha
- Un yiu ta mucho mas cu resultado of necesidad di union sexual
- Loke mucha mester soporta di mundo cu a perde respet pa su mes
ORANJESTAD (AAN) Ta cu asco nos mester a tuma nota Diamars di e dolor causa pa e buskeda di dos mucha inocente, cu a nace aparentemente di un tata, cu no merece nomber di hende.
E palabranan aki por zona duro pero nan ta menos duro cu e abuso cu continuamente nos mester observa boca keto di muchanan cu mester yora sin produci lagrima den un bida cu ningun hende lo kier hiba.
E pregunta serio ta bira: pakico hende ta produci un yiu of manera awor a bira moda, ta cumpra un yiu di mayornan cu ta bende mucha pa placa.
Ora papia di un mucha ta papia di un ser humano, cu awe a perde tur balor manerta rapportnan cientifico mes ta trece dilanti, pero cu por lo general hende no kier acepta, pasobra no ta cumbini hende acepta.
Un mucha ta inicio di loke nos ta yama hende, pues e nomber cu nos kier duna nos mes pa goza di tur derecho cu adultonan ta kere cu nan por tin na mundo sigur si nan tin forza fisico of di otro forma.
Ta un abuso total pa mira con un mucha a bira manera articulo di benta of un resultado di un momento di placer, sigui pa un falta total di sentido humano, ta destrui bida di un mucha como hende.\
Nos kier lanta para contra tur tipo di guera. Nos kier tur tipo di derecho pa hende pasobra nos ta hende. Awor kico un mucha ta? Pakico a trece un mucha na mundo?
E crueldad di loke ta pasa na Groningen na Hulanda, caminda dos mucha cu a wordo busca dor di un supuesto tata, awor a desaparece, atrobe ta pone nos para keto na e realidad di tanto mucha den un tempo, cu famia a spart for di otro y convivencia solamente tin balor si e por produci placa of placer.
Hende ta parce di a bira berguensa pa e conceptol di loke mester ta hende, cu ta diferente na bestia pasobra e mester tin un alma cu den tanto caso doloroso aparentemente no ta existi mas.
A bira momento pa adapta nos leynan y pa haci posibel pa portanan nobo habri na defensa di mucha, cu adaptacion di nos leynan.
Uno di e problemanan cu mas nos ta topa cune den e profesion di periodismo, ta preocupacion serio pa e forma cu leynan y exigencianan legal ta entrega mucha na situacionnan peligroso pero cu pa hende confronta, ta sumamente dificil.
E momento a yega pa habri boca y papia di situacion di tanto mucha inocente den matrimonio of otro tipo di convivencia no ni animal lo acepta pa nan yiunan biba aden.
Muchanan di mayornan cu ta prefera e gozo cu nan partner, sigur si e ta pone placa tambe riba mesa, y no ta mira con nan yiunan ta wordo afecta pa situacionnan cu ningun hende lo desea pa nan mes.
Pero cuidao, esun cu habri boca y puntra pakico ta trata mucha di tal forma, pasobra den hopi caso e mucha no tin ningun balor sigur no compara cu e beneficionan cu loke ta considera su mayor, ta disfruta.
Diferente factor ta haci nos mundo cada rato mas peligroso pa un mucha, cu no a pidi ningun hende pa pone na mundo, cu tin e deber di cuminsa lanta para pa defende e balor humano di un mucha.
Mayornan den tanto caso kier biba nan bida dushi. Nan no kier preocupacion y hopi biaha no ta ni na haltora di e dolornan cu un mucha ta confronta.
Si kier conoce realidadnan di mucha, mester atende cu profesionalnan manera maestronan of otro profesionalnan cu mester atende cu mucha, cu ta victima di abuso di tur tipo, comete pa figuranan cu e mester acepta den su bida.
Na April 2024 DIARIO a presenta e topico di abuso sexual di mucha pero tambe acopla na esaki, abuso cu ta wordo haci di inocentenan.
Con por ta cu muchanan cu no por defende nan mes, ta wordo castiga cu loke tabata uza pa suta catibo? Con por ta cu un homber cu hopi forza no ta bay enfrenta un campeon den boxeo pero ta uza un mucha pa e maltrata y e mama ta keda keto?
Cu asco nos a tuma nota e dianan aki di e dolor mara na buskeda di dos inocente atrobe na Hulanda. Nan mester a bay cu e figura cu ta yama su mes tata y ningun hende a mira nan mas.
Castigo perpetuo mester wordo introduci na tur cu abusa na cualkier forma di mucha, cu ley ta pone oficialmente den man di hende cu mester proteha nan pero ta resulta di ta burdugo di e clase mas barata cu creacion por a conoce.
Nos no ta papia mes di e mamanan, cu ta yuda abusador abusa di nan yiunan of ta cera nan boca pa nan por haya placa cu ta silencia nan concenshi.
Nos ta papia di guera rond mundo. Pero cuminsa papia di e abuso contra mucha cu a bira mercancia pa hende cu ta cumpra un yiu, djis pa tin e nomber di mama of tata!
