ORANJESTAD (AAN): Diaranzon minister di Finanzas Xiomara Maduro a yama un conferencia di prensa pa duna un splicacion riba e discusion cu tin rond di e donacion cu Gobierno a haci na Qredits,
e compania cu ta bringa micro credito na companianan chikito na Aruba pa yuda nan.
“Mester bisa cu siman pasa tabata tin un reunion publico cu minister Geoffrey Wever di Economia den Parlamento ta caba di formaliza locual tabata e yudanza aki cu a wordo ofreci na Qredits durante e pandemia”.
Na April di 2020 Aruba a cuminza enfrenta kico ta un pandemia y un lockdown pa prome biaha, segun Maduro.
El a sigui bisa cu 15 di Maart Aruba a cera su fronteranan y economia di Aruba a perde su entrada di turismo.
E mandatario a splica cu e tempo ey hopi ta esnan cu no tabata sa con nan lo haci fin di luna, unda cu hopi tabata pidi yudanza y esaki tabata conta sigur pa companianan chikito y tambe companianan grandi.
“Gobierno tabata trahando hunto cu un ekipo pa wak kico ta e yudanza cu por wordo duna sigur na companianan chikito, pasobra 90% di economia di nos pais ta consisti di companianan chikito y mediano y pesey cu velocidad grandi a traha pa entre otro brinda alivio fiscal y tambe un alivio special na e companianan chikito y mediano”, segun e minister.
El a sigui bisa cu riba 16 di April 2020 Gobierno a ricibi un peticion di Qredits via un carta unda cu nan ta dispuesto pa brinda micro credito special na companianan den necesidad, na un interes hopi reduci.
“Nos a pidi Departamento Economico pa yuda nos den esaki y tambe Departamento di Finanzas, pa wak con nos por haci e yudanza aki posibel y na dado momento nos a brinda e asistencia aki”.
Nos a trece dilanti na conocimento publico cu esaki lo bay wordo haci, pero mas importante cu henter e parti aki ta cu dia 1 di Juni 2020 hunto cu Prome Minister di Aruba nos a manda un carta pa asina informa Parlamento kico ta wordo haci y cua ta e medidanan cu ta wordo tuma pa asina yuda economia di pais Aruba pa wanta e pandemia, segun Maduro.
El a sigui bisa cu hunto esaki a duna di conoce cu mester bin un trayecto pa bay formaliza e yudanza aki, pero cu debi na e situacion di urgencia ta bay over caba pa por brinda e ayudo y ta bin bek y refleha esaki den presupuesto di 2020.
Maduro a sigui bisa cu e tempo ey a splica cu lo yuda entre otro cu FASE, Subsidio di Salario, Alivio Fiscal y Qredits. “Nos a menciona cada un di esakinan y nos a duna un splicacion amplio”.
Awor nos a haya e informacion cu mas cu 100 compania a haya yudanza na 2020 cu un suma di 3 miyon florin, pa nan por a sobrevivi e pandemia.
Hende por a puntra kico ta e balor agrega di esaki, pero mester pensa con lo tabata si 100 compania chikito lo a kibra y con lo a para cu e famianan cu ta depende di esakinan, segun Maduro.
E mandatario a sigui splica cu tur wowo tabata riba Gobierno pa brinda e yudanza aki y cu Gobierno na un manera adelanta a brinda Parlamento e informacion corecto, Parlamento mes no por a yama reunionnan normal, debi na e pandemia ye shelter in place cu tabata wordo poni.
