Gremionan hunto cu Sindicatonan a fada y ta exigi reunion urgente cu Gobierno

Asunto di tarifa di awa y coriente

ORANJESTAD (AAN): Seis luna a pasa desde cu tarifa di awa y electricidad na Aruba a conoce un subida substancial.  E aumento aki a dal comunidad di e isla chikito aki masha duro mes, y tur hende a sinti esaki den nan cartera.

   Con por ta cu awor na comienzo di Maart 2023 cu prijs di crudo a baha, y cu WEB Aruba NV ya no ta usando boilernan mas cu en general ta consumi 20% di fuel na e planta... keto bay e tarifa di awa y coriente ta mescos?

   Pesey mes, gremionan comercial, hunto cu gremio di pensionado, gremio di sector hotelero, y diferente Sindicato local a uni nan voz pasobra nan kier haya un contesta riba tur esaki lo mas pronto posible.

   Diaranzon atardi durante un conferencia di prensa, e Gremio- y Sindicatonan aki a divulga cu dia 1 di Februari 2023 caba nan a manda un carta pa Gobierno y Februari a finaliza y no a haya ningun contesta riba esey.

   Pa e motibo aki, e Gremio- y Sindicatonan aki a dicidi na bay publico pa informa pueblo di e grupo aki, y e desaroyonan cu nan ta mirando.

   Gremionan cu a firma:  E carta manda pa Gobierno, a wordo firma door di gremionan comercial AHATA, Comerciantenan Uni di Aruba (CUA), y Werkgeversvereniging Arubaanse Bouwnijverheid (WAB).  Tambe firma pa Sindicatonan FTA, Sindicato di Aduaneronan (SADA), Sindicato di Enfermeronan (ABV), Sindicato di Maestronan (Simar), Sindicato di esnan den Telecomunicacion (STT), y Sindicato SEPPA.  Esnan cu a uni tambe na dje awor ta Organizacion di Pensionadonan Publico Arubano (OPPA), y Sindicato di Polis (SPA).  Esaki a bira un grupo fuerte para.

    Despues di a duna palabra di bon bini pa Herrick Henriquez (ATIA), a duna palabra na Frans Ponson di Comerciantenan Uni.

    Ponson a indica cu tur hende ta preocupa desde aña pasa cu e subida substancial di tarifa di awa y electricidad.  E tempo ey, tur e gremionan a contact Gobierno y a sinta na mesa cu Ministro di Energia, Director di Utilities Aruba NV, y Director di WEB Aruba NV.  No tabatin un gobernante mas halto pa sinta na e reunion.

   Den e prome reunion ey, a duna un splicacion pakico a bin na un prijs asina halto.  E tempo ey a bisa cu esaki a bin debi cu (1) no a hedge prijs di crudo, (2) ora e prijs a subi durante guera, no a subi prijs di Aruba gradualmente, pero a dal pueblo cu subida di 26% (pa awa) y 24% (pa coriente), y a pidi gremionan coopera y cu 6 luna despues lo bin bek na mesa.

   Pero ya caba mas di 6 luna a pasa, y un carta a bay dia 1 Februari 2023 y no a tende nada mas.

   Pa un reunion cu Directornan mes ya no ta haya contesta, gremionan ta kere cu hendenan na nivelnan mas halto no por acudi na nan!

   A shutdown tur boilers: Ponson a bisa, cu ademas di a subi tarifa cu 24%, ata na November 2022 e compania WEB Aruba NV a shutdown tur boilernan na e planta, cu a trece un reduccion cu e Directornan mes a blof cune e tempo aya, cu e lo ta 20% menos Fuel Oil.  Ministro tambe a confirma esey aña pasa na gremionan.

   Tur hende cu pasa dilanti planta di WEB na Balashi, por mira cu ningun huma ta saliendo mas di e schoorsteen grandi.

   “Pues nos tin un reduccion tambe di otro 20%... y nos ta subiendo prijs caminda kizas nos ta 40% extra,” Ponson a bisa.

   E ta lamenta cu Gobierno no ta dunando gremionan ningun contesta, ni un fecha pa reunion.  Pasobra gremionan kier sa di con no a baha e tarifa siendo cu e planta a baha gasto di operacion... y ta keda sin haya contesta.

   Gremionan ta preocupa, pasobra Ministro y Directornan a priminti un reunion den 6 luna como update, pero te ainda no a tende nada mas y ya caba luna di Maart a drenta.

   Nan ta spera di haya contesta pronto di Ministro y Gobierno.