Minister Wyatt-Ras mustrando cu DAS ta e prome portal pa comunidad

ORANJESTAD (AAN):  Minister di Asuntonan Social y drs. Mervin Wyatt-Ras, den cuadro di su ronda di orientacion,

a realisa un bishita di introduccion na Departamento di Asuntonan Social (DAS), situa na Belgiestraat. Durante e bishita, e minister a topa cu e ekipo di afdeling beleid y a haya un recorido y presentacion for di directora di DAS, Rosanna van Dijk.   

            E mandatario a pone enfasis riba e papel crucial cu DAS ta desplega den nos comunidad. Como prome punto di contacto pa e ciudadanonan cu ta enfrenta e desafionan social, DAS ta un departamento clave pa duna sosten y direccion den e momentonan dificil. DAS ta mira un aumento den e cantidad di adulto mayor cu mester di asistencia, of nan yiunan cu ta acerca DAS en busca di asistencia pa haya un luga di cuido pa nan mayornan. E fenomeno di vergrijzing y aumento di problematica den hubentud ta realidad cu DAS ta enfrenta dia tras dia.

            Despues di e bishita na Belgiestraat, Minister Wyatt-Ras a continua su recorido y a bishita e dependance di DAS na MFA Noord, “Guia Social”, caminda a reuni cu e trahadonan social di e sector Welzijn. Aki a haya informacion tocante e trabao esencial cu e trahadonan aki ta realisa den comunidad. DAS ta forma un red amplio di apoyo, cu ta inclui Bureau Bijstand, Bureau Psychosocial y tambe KRB.

            Ta bon pa menciona cu 35 aña pasa, Minister Wyatt-Ras, a cuminsa traha na DAS como orthopedagoog y a expresa cu su compromiso pa sigui fortifica e institucion, pero ta reconoce e retonan y necesidad existente. Como parlamentaria, drs. Mervin Wyatt-Ras hunto cu mr. Mike Eman, a entrega un proposicion di ley pa trece cambio den e landsbesluit pa e gehandicapten uitkering, y awo como minister ta compromete pa pusha e cambio aki den un ley concreto.

            Minister Wyatt-Ras a tuma momento pa gradici e directora y tur miembro di e ekipo di DAS pa nan compromiso, pasion y amor pa e trabao nobel.