ORANJESTAD (AAN): Dialuna atardi, Minister di Salud Publico, Asunto Social, Cuido di Adulto Mayor y Cuido di Adicto, drs. Mervin Wyatt-Ras,
a haci un bishita di trabao na e tres facilidadnan di Stichting Hunto na unda cu e mandatario a haya un presentacion amplio di e Directora di Stichting Hunto sra. Dalgis Montalvo y Director Financiero sr. Randall van Trigt.
Stichting Hunto ta duna asistencia na personanan cu tin problema structural cu abuso di substancia pero tambe problema di salud mental y ta yuda e personanan aki reintegra den sociedad. Mester inverti den e personanan aki y haci nan parti inclusivo di nos comunidad. Aunke tin varios persona cu no kier e yudansa, asina mes Stichting Hunto ta cla pa duna nan un man ora nan mester esaki.
Centro Colorado ta duna guia den diferente fase, den cual e adictonan por pasa gradualmente den e proceso di rehabilitacion. Ademas na Meiveld tin un facilidad conoci como un “inloophuis” na unda ta duna sosten di “bemoeizorg” y “verslavingstraject”, y na Dakota tin e facilidad cu ta duna cuido basico di salud mental ambulante na mucha- y hobennan den necesidad.
Adiccion ta un problema complica pa cual ta esencial pa tin un colaboracion estrecho cu diferente entidad den cuido pa por yega na un solucion duradero y sostenibel. E vision di Minister Wyatt-Ras ta pa traha preventivo y duna yudansa optimal y den cierto casonan mester por facilita e “verwijzing” di adictonan cu problema psicotico pa entre otro Respaldo. Ademas tin un necesidad pa facilita e proceso di rehabilitacion pa medio di Departamento di Asunto Social.
Gobierno, hunto cu fundacionnan y entidadnan di Gobierno, mester garantisa cu esnan cu mester di e sosten aki, por haya esaki debidamente pa por ta parti funcional den nos comunidad y biba un bida digno.
