Minister Wyatt-Ras a felicita e tres hobennan di SVT-19 cu a conclui nan trayecto cu exito

E gradici e team di instruccion tambe

ORANJESTAD (AAN)--  Minister di Salud y Asuntonan Social, drs. Mervin-Wyatt-Ras, tabata presente durante e graduacion di e tres hobennan di Grupo SVT-19, cu a conclui, exitosamente,  nan aña di Trayecto di Formacion Social, na Mariniers Kazerne.

   E dignatario a felicita e hobennan aki, y a señala cu esaki ta un proyecto di aña 2013, entama pa Gobierno di Mike Eman e tempo ey, como un vision pa futuro, y ken actualmente tambe ta Minister Presidente di Aruba.

   “Mi ta kere cu e hobennan aki ta haya un segundo oportunidad p’ asina nan por forma nan mes pa bay den comunidad, y asina ehecuta un trabao”, Minister Wyatt-Ras a comenta.

   Pa loke ta trata e aspecto social, e ta haya cu ta hopi importante cu e hobennan ta wordo scucha, cu nan tin un voz den comunidad, y na momento cu algo no ta bay bon cu un hoben, e por haya un trayecto p’asina e por forma su mes y forma parti di e comunidad/.

   “Nos ta un comunidad inclusivo, un comunidad cu ta duna tur persona, un y tur, di tur edad tambe, oportunidad participativo, mi ta haya importante cu nos hobennan tambe por haya e oportunidad aki”, e mandatario a expresa.

   E mandatario tabatin palabranan di felicitacion pa henter e team, na e ocacion aki na señora Jessy Ras cu ta coordinador di e proyecto, y na Mariniers Kazerne tambe cu ta zorg pa ta e localidad unda e trayecto ta tuma lugar. El a gradici nan pasenshi y dedicacion di tur e añanan aki, y e perseverancia pa nan por sigui traha pa hubentud di Aruba.

E mandatario a comenta cu den e programa mes nan ta haya cierto habilidadan social p’asina nan por trata cu nan bida diario den comunidad.

“Departamento di Asunto Social (DAS) ta e esun cu ta atende cu famianan cu tin dificultad y problema. E idea ta pa zorg pa e hobennan aki, cu ta forma parti di un famia tambe, haya formacion, pa e ora ey nan por integra den famia tambe, pasobra tin di e hobennan aki, cu tin cierto problemanan y esey ta haci cu nan tin cu bin na un formacion social; y e ta un alivio tambe pa e famia. Kiermen, si bo yuda un hoben asina aki, bo ta yuda no solamente e hoben, bo ta yuda su famia, e bario y henter comunidad”, Minister di Salud y Asuntonan Social, Mervin Wyatt-Ras, a acentua.