Presidente di TOPA Axcel Figaroa:
- Corsou si a move pasobra e ta cla pa ricibi crudo mesora
ORANJESTAD (AAN) Presidente di Sindicato TOPA, señor Axcel Figaroa, den entrevista cu DIARIO a expresa, cu kizas un eror cu Aruba a comete durante e ultimo añanan, ta di a laga e instalacionnan di e refineria bay atras. Esaki pa referi na e posibilidad cu Aruba por a haya pa procesa e crudo di Venezuela.
“Corsou a haci e movecion ey pasobra e ta cla pa ricibi crudo mesora. Aki na Aruba, mirando e situacion den cual e refineria ta, e experto mes ta bisa bo cu e ta bay p’e, e no por a ricibi nada pasobra a laga e refineria bay atras asina hopi, cu e ta bay tuma bo tempo hasta pa por opera djis pa storage.
Esey ta un desventaha, lamentablemente, djis pa a opta pa no mantene, en todo caso e parti di storage cu por opera mesora, pero ta oportunidadnan cu tin eyfo”, segun Axcel Figaroa.
E ta kere cu ta un eror cu Aruba como pais, a fiha solamente riba un oportunidad; bo mester wak kico tur lo por sosode. El a indica cu Aruba tin cierto instalacionnan caba cu por probecha di nan economicamente, y sigur mirando cu tin otro islanan den Caribe cu ta haciendo esey caba.
“E ta un posibilidad cu nos no por laga un banda, y nos no por tarda riba dje pasobra dia cu nos ta bay tuma tur nos tempo pa tuma decisionnan, cu ora nos tum’e, e competencia ta bay ta asina grandi, cu no ta bal la pena mas pero esey no ta kita afo cu nos por haya un pida di e bolo aki”, Axcel Figaroa a remarca.
