Minister Wyatt-Ras a entrega certificado di fase 2 na cursistanan di SVT-20

ORANJESTAD (AAN): Minister di Asunto Social, señora drs. Melvin Wyatt-Ras, hunto cu Minister President, señor mr. Mike Eman,

a entrega certificado na cuater di e siete hoben cu a completa fase 2 di e Sociaal Vormingstraject (SVT-20).

Cursistanan cu a completa fase 2 di SVT-20 ta: Hazel, Kock, Ponson, Ridderstaat, Tromp, Werleman y Yarzagaray. Hazel, Ridderstaat y Tromp no tabata presente na e ceremonia, ya cu nan ta actualmente na Corsou pa sigui nan opleiding.

E grupo a completa fase 1 na december 2025, despues di cuater luna intensivo di disciplina, guia y desaroyo personal na Marinierskazerne Savaneta, bou supervision di Team O&T di Korps Mariniers.

Durante e ocho luna di fase 2, e cursistanan a combina nan stage laboral na companianan local cu diferente curso. E cursonan a enfoca, entre otro, riba comunicacion, maneho financiero, servicio na cliente, desaroyo personal, liderazgo y habilidadnan digital.

E combinacion di formacion y experiencia practico a duna nan oportunidad pa pone loke nan a siña den practica, tuma responsabilidad y adapta na un ambiente laboral.

Minister Wyatt-Ras a felicita e graduadonan pa e logro aki y a motiva nan pa sigui construi riba e base cu nan a forma durante e programa. El a enfatisa cu e certificado ta representa e esfuerso cu nan a haci pa completa e fase aki y cu ora un hoben avansa, su famia y comunidad ta avansa hunto cu ne.

Un gradicimento special ta bay na coordinadora Jessica Ras di Formacion Social, na Shamila Williams pa su aporte na e cursonan di fase 2, na Commandant Buijs y Kapitein Ligtvoet, na e kadernan di O&T Arumil y na Korps Mariniers, como tambe na tur mentor, profesional, compania y organisacion cu a guia e hobennan durante nan trayecto.

Mientras e graduadonan di SVT-20 ta sigui dilanti, un grupo nobo di hoben a cuminsa su propio trayecto di SVT-21 e siman aki.