ORANJESTAD (AAN): FAVI (Fundacion Arubano di esnan Visualmente Incapacita) a cuminsa oficialmente nan Accion di Donacion 2026 anual.
Durante un momento special cu prensa na FAVI, representantenan di media no solamente a haya informacion tocante e accion, pero tambe a haya oportunidad pa experiencia pa un rato con ta sinti ora bo no por conta cu bo bista.
Despues di e palabranan di bonbini di director Cetty Baarh-Bijlhout, e periodistanan presente a tapa nan wowo y presencia e parti informativo cu wowo tapa. Cu e experiencia aki, FAVI tabata kier laga nan sinti, na un manera simpel pero significativo, con diferente ta ora informacion no ta automaticamente accesibel visualmente.
Durante e encuentro a duna informacion tocante e trabou di FAVI, e sosten cu e fundacion ta brinda na muchanan y adultonan cu ta ciego of cu tin vision limita na Aruba, y e importancia di e Accion di Donacion anual. Esaki a wordo presenta door di Sra. Merdith Faarup-Laclé cu ta e maestra Ambulante na FAVI.
E fondonan cu ta wordo recauda durante e accion ta yuda FAVI pa continua y sigui desaroya su servicionan. E donacionnan ta wordo uza entre otro pa guia y rehabilitacion, enseñansa adapta, ayudo tecnico, tecnologia, actividadnan y sosten cu ta contribui na independencia y participacion di nan clientenan.
Director Cetty Baarh-Bijlhout tambe a expresa su gran aprecio pa e colectantenan y boluntarionan fiel cu cada aña ta bolbe pone nan mes disponibel pa sostene e accion. Tambe el a gradici tur e donadornan cu ta sigui sostene FAVI.
Sra. Catherine Midi, Coordinadora di actividad a splica con e accion di donacion ta wordo organisa y prepara tur aña.
“Cada contribucion, grandi of chikito, ta yuda FAVI pa continua cu su trabou pa personanan cu ta ciego of cu tin vision limita na Aruba. E colectantenan ta embahadornan importante di FAVI den nos comunidad.”
Cu e inicio oficial di awe, sr. Dairon Ras di administracion a haci un yamada na comunidad Arubano pa sostene e Accion di Donacion 2026 y, pa asina aki hunto contribui na un sociedad den cual personanan cu un limitacion visual por participa na un manera mas independiente y completo posibel.
Esaki por di diferente manera, pasa nan FAVI y haci bo donacion y haya sa mas di FAVis u serviccionan; manda bo suma di donacion via banco Arubabank: 7024380290 of RBC 31366122; traha un standing order pa asina aki tur aña bo suma por wordo kita; via pay.aw, good deeds y scohe FAVI of subi ariba nan website y scoge haci donacion.
FAVI su comision di accion di donacion ta gradici prensa, colectantenan, boluntarionan, donadornan y henter e comunidad pa nan sosten continuo.
