Minister Wyatt-Ras a bishita centro di cuido den marco di fortalecimento di cooperacion cu SVGA

ORANJESTAD (AAN): Proposito di cada bishita, ta di haya un bista amplio di cada departamento.

E siman aki Minister di Salud Publico, Asunto Social, Cuido di Adulto Mayor y Cuido di Adicto drs. Mervin Wyatt-Ras, ricibi door di directora Els van Homelen, team di maneho y esun financiero, como tambe e lidernan di grupo, e personal y e clientenan di e diferente instancianan. 

            A hiba un recorido entre otro na Briyo di Solo, Centro Man na Obra, Pasadia Bibito Pin, Cas Blenchi y a finalisa na Cas Shabururi caminda por a haya un presentacion di con ta traha cu medio cu tin na alcance. 

            Minister Wyatt-Ras a expresa cu den cada centro ta traha cu curason, uno grandi y bunita, caminda ta traha cu pasion dentro di e diversidad cu cada cliente ta presenta. 

            Reto presente manera gran mayoria di departamento y cual tin e atencion y cu e bishita di e ministerio ta subraya e importancia aki. Intencion ta pa logra den dialogo, conhuntamente cu e directora y cada departamento concerni, pa sigui cu e desaroyo y logra meta y proyecto fiha. 

            Directora Els van Homelen tambe a duna di su banda palabra di gradicimento pa e bishita di Minister Wyatt-Ras na Stichting Verstandelijk Gehandicapten Aruba (SVGA). En berdad e ta importante pa mira cu mesun wowo e trabou cu ta tuma luga na un centro asina. 

            E contacto personal ta reenforsa e relacion y asina duna miho oportunidad, den forma di dialogo, pa yega na solucion, surpasa reto y logra meta cu tin dilanti.