ORANJESTAD (AAN) – Den conferencia di prensa e specialista di programanan di cultura pa Comision Nacional di Unesco na Aruba, señora Hernandez, a hiba palabra.
E conferencia di prensa aki a tuma lugar den e Centro nobo di Muchila Creativo, den cual a presenta e programa pa Diadomingo 18 di Mei awo, cu ta wordo celebra e Dia Internacional di Museo.
E Dia Internacional di Museo a wordo declara na aña 1977, door di International Council of Museums, pa promove y concientiza comunidadnan rond mundo, riba e importancia di museonan tanto pa cultura como pa educacion y ciencia.
“Y nos ta aki, celebrando na Aruba tambe, manera ta wordo celebra na henter mundo pa hopi aña caba, y apenas na Aruba e ultimo añanan nos a cuminza pone atencion riba e dia importante aki.
Riba e Dia aki nos ta bay tin diferente partnernan di organizacionnan den Playa, cu a dicidi di cera cabes y organiza un celebracion grandi pa Dia Internacional di Museo, y di 10 or di mainta te 3 or di atardi, ta bay tin actividad den diferente museo, galeria, y instancianan di herencia aki na Aruba. Pa loke ta e celebracion den Playa, nos por conta na prome lugar, cu ta bay tin cu cooperacion di Arutram cu ta bay ta coriendo den horario di 10’ or di mainta te 3’ or di atardi, pa percura cu unda bo para ta bay yega riba e rutanan di Arutram”, señora Hernandez a indica.
El a menciona entre otro, Muchila Creativo cu ta ubica banda di e antiguo edificio di Burger King, den Caya Grandi. Check Point Color tambe ta bay ta habri cu diferente actividad, tambe Museo Historico Arubano, y Fort Zoutman tambe lo tin actividad y e oportunidad di por subi e toren y nan cushina di chichi tambe lo ta habri, mescos cu exposicion.
Biblioteca Nacional ta bay tin exposicion den e sala, presenta pa studiantenan di Universidad di Aruba. Nan Café tambe ta bay ta habri. Na Arubiana Caribiana tambe ta bay tin exposicion di e documentonan di Coleccion Aruba cu a wordo inscribi na “Unesco Members of the World” algun siman atras.
Banda di esaki lo tin Archivo Nacional cu su exposicion di Segundo Guera Mundial, y un exposicion chikito di NV Elmar y su 75 aña di existencia.
Museo Arkeologico tambe lo ta habri cu charlanan tocante Santana di Indiannan di Santa Cruz, y tayernan di trabao di trahamento di hat piece di carnaval y lo tin algun pasaboca.
