Minister Wever a introduci Roly Sint Jago como Presidente di Raad van Bestuur di Aruba Fair Trade Authority

Comision independiente a yuda gobierno den e proceso di seleccion...

ORANJESTAD (AAN):   Diabierna mainta, Minister di Asuntonan Economico, Comunicacion y Desaroyo Sostenibel Geoffrey Wever a yama un rueda di prensa pa asina haci algun anuncio importante pa loke ta e Aruba Fair Trade Authority, esta su bestuur nobo.

            E mandatario a inicia introduciendo na comunidad di Aruba e presidente di Raad van Bestuur di Aruba Fair Trade Authority (AFTA), Sr. Roly Sint Jago, cu despues di un proceso largo a wordo selecciona y cu a nombra pa medio di un Landsbesluit como e presidente di e Raad van Bestuur di AFTA.

            Pa basta luna ta trahando riba e implementacion di AFTA. E ta un organo independiente cu ta implementa pa ley y cu mester a wordo prepara door di Gobierno. Gobierno a wordo asisti den esaki cu fondonan di Landspakket di Hulanda . Sr. Albert Scholten ta e Implementatie Manager cu a asisti Departamento di Asuntonan Economico den e implementacion di AFTA, Minister Wever a indica.

            El a sigui bisa cu Directora di Departamento Asuntonan Economico y Industria ,

Sra. Maria Dijkhoff-Pita a traha hunto cu Sr. Scholten pa haci e preparacion completo pa Aruba Fair Trade Authority por a bira un realidad.

            A prepara e profile di e presidente y e miembronan di Raad van Bestuur y a institui un comision independiente pafo di gobierno cu ta consisti di presidente di Corte Comun, di un 'wervingsbureau' y e implementatie manager. Hunto nan a haci e parti di contratacion, a papia cu e candidatonan, a scoge nan y na final di dia e mandatario a haya un propuesta riba ken tabata e miho candidato den concepto di e 'wervingsselectie commissie' y asina a bay over na nombra Sr. Roly Sint Jago como Voorzitter y Sr. Martijn Snoep como Lid, a bisa.

            Minister Wever ta considera esaki como un momento hopi importante ya cu ta un proyecto cu a tuma su tempo y cu e haci den un forma hopi cauteloso. A percura pa por a selecciona e miho candidatonan pa asina por tin un bestuur di un organo cu ta bay ta hopi importante pa competencia husto na Aruba. "Un organo cu den futuro pueblo lo bay ripara kico e balor agrega ta di Aruba Fair Trade Authority y e ta cuminsa na percura pa tin hendenan cualifica, hendenan cu tin e baggage y cu tin e conocimento pa por guia un organisacion asina akinan", a expresa.