Minister Wever a duna presentacion di 'Sustainable Development Goals' na scol Graf von Zinzendorf

ORANJESTAD (AAN):  Siman pasa Minister Geoffrey Wever a cuminsa cu su proyecto di presentacion  di e metanan di desaroyo sostenibel, e ‘Sustainable Development Goals (SDGs)’, na alumnonan di 6e klas di scolnan basico.

            E presentacion ta pa yuda cu conscientisacion di kico e metanan ta ensera y con cada un di nos por yuda na logra e metanan. E siman aki Minister Geoffrey Wever a bishita scol Graf von Zinzendorf na San Nicolas.

            Kico ta desaroyo sostenibel? Desaroyo sostenibel a ser defini como desaroyo cu ta cubri e necesidadnan di e presente sin compromete e abilidad di futuro generacionnan pa por cubri nan propio necesidadnan. Esey ta nifica cu cada generacion mester tene cuenta cu nan bienestar y cu e bienestar di e siguiente generacionnan tambe. Pa logra esaki mester tin harmonia entre e aspecto humano, balansa den desaroyo economico y prosperidad, y tambe proteccion pa nos medio ambiente.

            E SDGs ta consisti di 17 meta pa paisnan na mundo traha na dje pa un miho mundo. E SDGs ta wordo parti den 5 pilar: People, Prosperity, Planet, Peace y Partnership.

            Minister Geoffrey Wever kier manda un palabra di “danki na Graf von Zinzendorf pa a ricibi nos.”