Minister Wendrick Cicilia ta instala comision pa mehora conectividad di transporte aereo

Entre islanan ABC

ORANJESTAD (AAN): Minister di Turismo, Transporte y Labor, mr. Wendrick Cicilia, a anuncia oficialmente e instalacion di un comision special estableci pa dedica nan mes na fortalecemento di conectividad di transporte aereo entre Aruba, Bonaire y Curaçao.

   Segun Minister Cicilia, transporte aereo interinsular ta un pilar fundamental pa economia, turismo, comercio y mobilidad di e Rubianonan y nos rumannan di Bonaire y Curaçao. “Un conectividad eficiente, confiabel y pagabel entre e islanan ABC ta esencial pa continua fortalece nos cooperacion regional y crea mas oportunidad economico pa nos pueblo”, asina Minister Wendrick Cicilia a expresa.

   E comision lo enfoca riba: (*) Analisa e situacion actual di e vuelonan interinsular. (*) Identifica obstaculo operativo y regulatorio. (*) Evalua structura tarifario y nivel di frecuencia. (*) Presenta recomendacionnan concreto y implementabel pa corto y mediano plaso.

   E comision ta consisti di e representantenan di Directie Luchtvaart Aruba cu ta Edwin Kelly (Directeur Directie Luchtvaart), y Albert Boekhoudt (Medewerker Luchttransport).

   Tambe tin Aruba Tourism Authority cu ta Ronella Croes (CEO), y Tirso Tromp (Area Director).  Tambe tin Aruba Airport Authority N.V. cu ta Johnny Andersen (CEO), y Jo-Anne Arends (Aviation Business Development Executive).

   Tambe tin di Ministerio di Turismo, Transporte y Labor, esta Christiaan G. Dammers (President di e comision), y Sonaly A. Fernandez-Acosta (Miembro).

   Minister Cicilia a expresa su plena confianza den e profesionalismo y compromiso di e miembro nan. El a enfatisa cu e obhetivo principal ta logra un sistema di transporte aereo interinsular cu ta sostenibel, competitivo y directamente na beneficio di nos pueblo y nos economia regional.

E comision lo cuminsa cu su trabaonan dentro di poco tempo y lo presenta su prome informe conforme e planificacion estableci.