Minister Wendrick Cicilia presente pa ubica e prome FAD den lama

Sosteniendo e piscadonan local

ORANJESTAD (AAN):Minister di Turismo, Transporte y Labor, mr. Wendrick Cicilia, tabata presente diadomingo mientras a ubica e prome Fish Aggregating Device (FAD) den awanan teritorial di Aruba, marcando un paso importante den sostene e comunidad local di piscado di Aruba y fortificando practicanan sostenibel di pesca.

E alocacion di e FAD ta sigui despues di un compromiso haci door di Minister Cicilia durante un reunion cu a tuma luga den luna di december 2025 cu e piscadonan y e representantenan di organisacion di pesca. Durante e reunion ey a trata varios preocupacion y necesidad di e sector di pesca, entre otro e importancia pa mehora e oportunidadnan di pesca mas cerca di costa di Aruba.

-Cumpliendo cu promesa

Fish Aggregating Device (FAD) ta structuranan poni den lama, diseña pa atrae pisca manera dorao y tuna. Door di crea un punto central caminda pisca te reuni naturalmente, FAD ta yuda e piscadonan localisa pisca mas eficientemente. A instala e prome FAD menos cu dos miya for di costa, loke ta permiti e piscadonan acceso mas facil y sigur na areanan di piscamento productivo.

Minister Cicilia a enfatisa cu e iniciativa aki ta parti di e compromiso mas amplio di gobierno pa sostene e piscadonan di Aruba y pa reconoce e rol importante cu nan ta hunga den economia y cultura di e isla.

-Balora e piscado

“Nos ta respeta y balora tur hende cu ta subi lama pa pisca. Piscamento ta un actividad cu ta rekeri dedicacion, conocemento y curashi. Como gobierno, nos kier garantisa cu nos piscadonan tin miho herment y condicionnan pa ehecuta nan trabou,” Minister Cicilia a enfatisa.

Ademas di mehora e oportunidadnan di piscamento, e FAD tin un componente importante di siguridad. Door di atrae pisca mas cerca di awanan teritorial di Aruba, e piscadonan tin menos chens di bay leu for di costa poniendo nan bida na peliger en busca di pisca.

“Nos meta ta pa stimula actividad di piscamento na Aruba mientras tambe ta hacie mas sigur. E aparatonan aki ta brinda e piscadonan un siguransa mas grandi cu nan lo haya pisca sin mester bay leu den lama,” Minister Cicilia a agrega.

Lo tira un total di seis Fish Aggregating Devices den awanan di Aruba. E instalacion realisa awe diadomingo ta marca e prome paso den e iniciativa aki, cu lo continua den e proximo periodo den colaboracion cu stakeholdernan local y comunidad piscado.

Pa medio di iniciativanan manera esaki, Minister Wendrick Cicilia y Gobierno di Aruba ta sigui traha pa fortalece e fuente di ingreso di e piscadonan local mientras ta promove uzo sigur, responsabel y sostenibel di e recursonan marino di Aruba.