Den conexion cu Dia Internacional di Hende Muhe

Señora Magaly Maduro di SICA:

• Simposio di empoderamento di SICA tabata un exito grandi 

ORANJESTAD (AAN): E actividad di Soroptimist International Club Aruba (SICA) diasabra 7 di maart, den conexion cu Dia Internaciona di Hende Muhe, a sobrepasa tur expectativa. Un sala yen di hende muhe, huntu cu algun hende homber, a asisti na e yamada di SICA pa un encuentro varia cu sigur a enrikese e dialogo, inspira participantenan y crea un espacio di conexion, reflexion y empoderamento pa tur esnan presente.

   Durante e simposio aki, cu a hiba e tema di Trauma, a hiba palabra señora Sueli Kelly-Quant, un psicologo hoben di profesion, kende a comparti su conocemento riba kico exactamente ta trauma y con trauma por manifesta den bida di un persona. El a slica cu ta importante pa compronde y procesa trauma pa asina por yega na un bida mas balansa.

   Señora Clementia Eugene, kende ta un trahador social, a papia riba trauma intergeneracional, uzando su mes como ehempel personal. Den su presentacion, el a comparti con experiencia dificil den bida no tin cu defini futuro di un persona. Cu determinacion, el a logra supera obstaclonan y uza e experiencia ey como motivacion pa dedica su carera profesional na yuda otro hende.

   Pa cera e programa, señora Geraldine Lacle a guia e audiencia den un momento special di reflexion. El a cuminsa cu un charla motivacional cortico riba e poder di palabra y con loke nos bisa y pensa por influencia nos estado emocional y mental. Despues, el a invita e participantenan pa forma parti di un meditacion Estado Alfa, cu a yuda eleva e energia.

   Un aspecto hopi bunita durante e simposio tabata cu SICA a duna oportunidad na diferente negoshi chikito local pa presenta y bende nan productonan durante e actividad. Esaki no solamente a agrega un dimension creativo na e evento, pero tambe a stimula emprendemento local. Tambe tabata tin un grupo di persona cu limitacion visual cu a duna masahe na tur cu tabata desea.

   Presidente di SICA, señora Magaly Maduro, den nomber di tur e damanan cu ta traha cu dedicacion den e organizacion, ta expresa profundo gradicimento na tur esnan cu a acudi na e simposio, haciendo esaki un exito rotundo. Danki special ta bay tambe na e Parlamentarionan Evelyn Wever-Croes y Eduard Pieters, kende a honra e evento cu nan presencia. Tambe ta gradici señora Ruthy Vrieswijk pa su bunita poema dedica na hende muhe. Un gradicimento special ta bay tambe na tur tres orador cu generosamente a comparti nan conocemento, experiencia y tempo pa inspira e audiencia.