Brechtje Huiskes ta informa:
*Cuminsando na Centro di Bario Noord, dia 15 maart
*Ultimo sesion ta riba “Imigracion” na IOM hunto cu HIAS
ORANJESTAD (AAN)—Señora mr. Brechtje Huiskes, di Tienda di Ley di Universidad di Aruba, a informa den entrevista cu DIARIO, cu nan lo drenta den diferente bario, pa brinda ayudo y informacion.
Tienda di Ley tin diferente fecha cu nos ciudadanonan por bishita pa haya conseho riba preguntanan legal, si nan no tin e recursonan pa bay algun otro lugar.
“Tambe e aña aki, pa prome biaha, nos ta haci algun sesion den e barionan di Noord, Savaneta, y Santa Cruz, pa duna conseho general tocante erfenis.
“Den nos experiencia tin hende pa ken ta un tiki dificil di bay un abogado inmediatamente, por ta nan no sa si nan pregunta ta un pregunta pa un abogado, of tambe ta posible cu nan no tin e fondo pa bay un abogado y nan kier un conseho mas specifico”, mr. Huiskes a indica.
Diasabra 15 di maart Tienda di Ley di UA lo ta den Bario di Noord, Diasabra 26 di April nan ta den Centro di Bario Santa Cruz, Diasabra 10 di Mei lo ta na Centro di Bario Savaneta, y Diasabra 31 di Mei nan lo tin un sesion cu HIAS na IOM, pa hende cu tin pregunta tocante imigracion.
Señora mr. Brechtje a splica cu no ta necesario pa e persona cu busca informacion sa di Ley, pero nan ta invita e publico en general, pa haci pregunta riba Erfenis, por ehemplo, si tin un cas den famia y un persona no sa con pa compartie cu su rumannan, con esey ta traha, pakico bay notario, of si mester bay Huez”, el a declara.
E interesado por bin na e sesion general y despues di esaki por haci un pregunta specifico. Y si ta un pregunta super specifico, e ta wordo invita pa bin Universidad di Aruba mes.
Logicamente cu esnan interesa riba tereno di Ley por acerca Universidad tambe pa haya informacion general.
Pa loke ta e sesionnan den Centronan di Bario, tur ta gratis, no ta necesario inscribi, y pa e horario di cada sesion por yama e Centro di Bario pa puntra ki ora e lo tuma lugar. Tambe tin un facebook page Tienda di Ley Aruba y por haya tur informacion tocante e sesion aki tambe.
