ORANJESTAD (AAN) – Minister Ursell Arends, Titular di Transporte, Integridad, Naturaleza y Sector Primario, ademas, Asuntonan di Adulto Mayor, a wordo invita pa bishita Oasis Farm na Pos Chikito.
Den un entrevista cu DIARIO, e dignatario a menciona cu tur hende ta conciente cu locual a pasa cu Oasis e ultimo lunanan, den e periodo cu a surgi e efectonan di e tormenta tropical.
E dianan ey Oasis a haya oportunidad di desmantela cierto partinan cu nan a desaroya. E dignatario a indica cu den su ministerio, Oasis Farm ta un proyecto cu ta contribui positivamente pa loke ta concerni seguridad di alimentacion, unda e kier yega como minister di naturaleza y sector primario.
Pa e mandatario ta importante, ya cu Aruba ta biba den un Estado di Derecho, cu a haya cooperacion di DOW y DIP, pa duna Oasis un periodo pa asina e por wordo re-ubica unda originalmente, nan a desaroya. Arends ta haya cu Oasis ta contribui unda Aruba kier yega un dia, esta na cosecha productonan pa por alimenta nos propio hendenan. E dignatario a subraya cu pesey el a bishita e lugar, pa duna realze na e proyecto aki pa sigui duna empuhe na e sector primario, y esaki ta un muestra cu Aruba mes por.
“Si nos por pone e meta nos dilanti di cuminza cultiva y alimenta nos hendenan y sigur e proyecto aki ta wordo bishita hopi door di turistanan tambe y esey ta hacie un proyecto auto-sostenible. Hopi alumno di scol tambe ta bishit'e pa conoce kico Oasis Farm ta haci, y esaki ta na loke nos ta duna empuhe y sosten. No mester keda solamente na Oasis Farm, pero e por tuma lugar na otro sitionan tambe, rond di nos Isla, pa asina aki mustra cu nos mes por cultiva”, e dignatario a señala.
El a agrega cu e proyecto aki ta mustra cu na Aruba no solamente por cultiva papaya, bacoba, y diferente tipo di berdura, pero por atende cu pato y galiñanan tambe. Esaki ta e direccion den cual nos Isla mester bay, segun Minister Ursell Arends.
E dignatario a señala cu no solamente Oasis Farm pero tur otro construccion mester atende nan mes na loke ley ta stipula y nan mester realoca unda nan tin permiso pa construi y wak na ki otro solucion por yega. Minister Arends a reitera cu e tabata tey pa duna e proyecto un empuhe cu e ta convenci cu e ta un proyecto positivo pa Aruba. E ta spera cu e por haya sosten tambe di comunidad y di e turistanan.
