Horacio Oduber Hospital a inicia bek cu encuesta “Duna bo opinion”

ORANJESTAD (AAN): Desde 1 di September 2022 Horacio Oduber Hospital (HOH) ta start bek cu su encuesta ya conoci “Duna bo opinion” pero den un bachi moderno, esta completamente digital.

Antes e encuesta aki tabata uno manual y desde awe tur pashent cu ta interna den HOH ta haya e oportunidad pa duna nan opinion di forma digital via un tablet na final di nan estadia. Un paso den direccion moderno, eficiente, rapido y anonimo.

Durante un session di informacion a lansa e producto final pa e hefenan di cuido riba piso unda nan a ricibi splicacion amplio di e lista di pregunta, e proceso di rapport, nan por a mira e encuesta, ricibi instruccion y mas. Y na final a otorga na cada uno e tablet di nan departamento pa asina e pashentnan riba nan piso por yena e encuesta na final di nan estadia.

   “A sinta cu stakeholders interno pa asina tin un lista di pregunta “up-to-date” cu e enfoke pa Hospital y su dunadonan di cuido sa pa medio di e encuesta aki e experiencia completo di pashent desde admision te na su salida. Mirando cu HOH ta brinda cuido na comunidad di Aruba y tambe na turista e encuesta lo ta obtenibel den cuater lenguahe esta Papiamento, Ingles, Spaño y Hulandes”, asina Charlaine Huntington di departamento di comunicacion a splica. E lista di pregunta no lo tuma mas di 5 minuut di bo tempo y ta reparti den seccion di admision, experiencia cu enfermero, dokter di piso y tambe specialista. Tambe por duna opinion riba experiencia general y tin espacio pa comentario.

   “E resultado lo mustrami con e departamento ta trahando pa cu e cuido di e pashent, paso dia aden y dia afo nos enfoke ta pa drecha e calidad di cuido”, asina Marloes van Kouwen, hefe di departamento di cuido A2 ta conta nos. E departamentonan di cuido cu ta forma parti di e prome fase di Duna bo Opinion ta A2, A3, A4, B3, B4, Pediatria y Maternidad.

Na final di estadia di cada pashent un colega enfermero lo hiba e tablet pa e pashent unda despues di un introduccion cortico e pashent por yena su opinion trankil y di forma anonimo prome cu e bay cas. Mensualmente e hefenan di cuido riba piso lo ricibi e rapport di nan departamento concerni y asina por introduci cambio unda ta necesario pa asina banda di e salud cu ta prioridad di HOH nos mehora e servicio, experiencia, hospitalidad y mucho mas pe pashent.

   Daisy van der Biezen, hefe di departamento di Pediatria ta indica cu “mayornan lo yena e encuesta pa e muchanan cual lo yuda nan mehora e servicio riba departamento y alabes mi ta contento cu e ta bira digital cual ta un avance pa HOH”.

   Danki na e team completo cu a traha riba e proyecto aki pa haci’e realidad cu awe nos por bay LIVE cu e encuesta digital di HOH. Alabes kier recorda tur pashent cu e ta completamente anonimo, pues no duda y na final di bo estadia tuma algun minuut di bo tempo y duna nos bo opinion paso e ta conta y ta importante pa nos na HOH!