Minister Ursell Arends ta anuncia expansion di areanan Ramsar

*areanan protegi na bienestar di Aruba su naturalesa

ORANJESTAD (AAN): Diabierna merdia durante e simposio titula "Nature-Based Solutions (NBS)", Minister Arends a duna un discurso den e aula di Universidad di Aruba.

            E simposio a wordo organisa door di Fundacion Parke Nacional Aruba y Dutch Caribbean Nature Alliance. E enfoke di e evento ta pa expande conocemento y accionnan riba solucionnan cu ta encera procesonan natural pa aborda desafionan ambiental entre e paisnan den Caribe Hulandes.

            E simposio a conta cu participantenan renombra manera Su Altesa Real Prinses Beatrix, Su Excelencia Gobernador Boekhoudt y Su Excelencia Prome Minister Wever-Croes, hunto cu diferente invitado distingui.

            Den Minister Arends su discurso e la expresa su gratitud pa e organisadonan, enfatisando e importancia di colaboracion pa avansa e rol di naturalesa den nos comunidad. E la urgi e audiencia pa reconoce y aprecia e esfuersonan colectivo di esnan presente y tur cu tin naturalesa na pecho.

            E discurso a pone enfasis ariba e urgencia di iniciativanan pa preservacion di naturalesa y alabes e compromiso di Aruba pa conserva naturalesa mediante leynan y maneho.

            Un anuncio cu sigur a gara atencion di tur presente tabata e expansion di areanan protegi bou di e convenio di Ramsar na Aruba. Esaki fuera di Spaans Lagoen, awo ta inclui e sistema di Western Wetlands, cual ta consisti di cinco saliña, Zuidkust, Westpunt y Oostpunt.

            Ramsar ta un reconocemento internacional pa e balor natural di areanan tanto riba tera como marino. Den futuro un "Island Round Marine Park" tambe lo ta parti di maneho di nos areanan marino. Contrario na Ramsar, e designacion di un parke marino ron di Aruba ta un manera di reconoce, den legislacion nacional e necesidad pa uza e areanan aki den un manera sostenibel. Aunke e reconocemento di Ramsar no ta prescribi regulacionnan specifico, e ta stimula Aruba pa intensifica su esfuersonan di conservacion. Pa duna como ehempel, Spaans Lagoen a ricibi reconocemento di Ramsar den e decada di aña 80, pero designa formalmente como area protegi den ley a sosode na 2017.

            Minister Arends ta remarca cu e status di Ramsar tin como meta pa proteha e arenan aki sin interveni cu actividadnan economico, enfatisando reduccion di daño y restauracion di naturalesa den caso di daño cu ta inevitabel.

            Tambe a remarca e importancia di cooperacion entre fronteranan den Caribe Hulandes pa conservacion marino. Minister Arends su ambicion ta pa nos yega na un "ABC-wide" Hope Spot  na 2024, colaborando cu  Mission Blue pa proteha e lama comparti entre Aruba, Boneiro, y Corsou. E palabranan di Sylvia Earle, presidente di Mission Blue: “No water, no life; No blue, no green” a wordo menciona cual ta enfatisa e rol fundamental di awa pa mantene bida riba tera.

            Palabra di gradicimento a bay na organisacionnan di FPNA, DNM, TurtugAruba, Aruba Birdlife Conservation, Aruba Marine Mammal Foundation y Wageningen Universtiy pa nan efsuersonan colaborativo den e gran logro di e status di Ramsar pa e regionannan adicional na Aruba.

            "Laga nos tur continua di tin pasenshi pa representa, preserva, conserva y persisti den nos mision na bienestar di naturalesa. Desaroya nos mes hunto cu naturalesa sin lubida pa disfruta tur locual naturalesa ta ofrece. Naturalesa ta nutri nos, ta ora pa nos tambe nutri naturalesa", Minister Arends a expresa.