ORANJESTAD(AAN): Recientemente riba iniciativa di minister Ursell Arends FCCA a organiza un foro pa duna informacion valioso relaciona cu vivienda, specialmente pa adultonan mayor.
Den un entrevista director di FCCA Julie Wever a splica cu a intercambia informacion y a scucha kico ta e retonan grandi cu tin.
“E reto mas grandi ta cu nos tin 3600 hende ta warda pa un cas y di e 3600 hendenan aki, mitad ta 55 plus”.
Di e grupo aki, tin alrededor di 700 pensionado cu ta wardando riba un cas.
E reto grandi ta e finanzas pa construccion di tanto cas pa por cumpli cu e demanda, pero tambe tereno, segun Wever, kende a sigui bisa cu ta algo cu mester traha riba dje como Aruba, pa yega na un solucion.
E director a sigui bisa cu e otro parti ta cu e adulto mayor a aporta na Aruba, pero nos mester realiza cu e pensioen ta keda abao.
“Nos a haci un sondeo riba e ‘bestaansminimum’ y a resulta cu pa un adulto e ta 2500 florin pa luna, siendo cu e pensioen ta rond di 1000 florin”.
E bestaansminimum pa dos adulto ta 3770 florin, mientras cu e pensioen di dos adulto ta 2000 florin y esey ta si nan a traha tur nan periodo, segun Wever.
El a sigui bisa cu e reto aki pa adultonan mayor haya un cas ta uno dificil pero importante y pesey FCCA kier purba cumpli cu nan.
