Minister Ursell Arends a felicita Fundacion Hende Homber pa nan di diez aniversario

ORANJESTAD (AAN) – Minister Ursell Arends a felicita e Fundacion Hende Homber, durante e conferencia cu a tuma lugar en conexion cu nan diez aña di existencia.

Minister Arends a expresa cu e tareanan cu e Fundacion a bin ta desplega durante e ultimo diez añanan ta muestra di e necesidad cu tin di guia pa hende homber, den nos comunidad. El a desea nan hopi aña mas di existencia, y cu nan por sigui contribui na un forma positivo pa yuda desaroya e hendenan homber cu di cualkier forma tin necesidad di e asistencia di e fundacion.

Mas cu tur cos, e dignatario a bisa, nan por sigui conta cu e sosten di Gobierno di Aruba, y sigur e como Minister a duna nan sosten durante e ultimo dos añanan y el a comparti y celebra ora nan a tene e conferencianan aki, y aworaki a celebra hende homber cu ta marca e diferencia. Minister Ursell Arends a bisa cu hende homber por marca e diferencia den diferente forma, y como tata di famia e mes ta inculca e balornan aki den su propio bida diario, mirando cu e tin un yiu di 17 aña cu ta wak’ e como ehemplo, y e tin cu gui’e di e miho forma pa ora e bira adulto tambe e tin e norma y balornan inculca den su persona.

E mandatario a subraya cu esaki ta e tarea cu Fundacion di Hende Homber ta haci: Inculca norma y balornan den e hendenan homber di nos comunidad. “Mi sa cu e fundacion tin necesidad di sigui expande, y esaki ta algo cu Gobierno di Aruba lo colabora cu nan, pa asina aki nan por logra nan meta, y mas cu tur cos e meta cu nos tur tin den comun, pa sigui brinda e servicio na hendenan homber cu mester di esaki”, Minister Ursell Arends a señala.