ORANJESTAD (AAN): Durante un conferencia di prensa convoca pa PKF Aruba, a informa cu nan ta bin cu nan prome seminario titula “What’s Your Company Really Worth?” conhuntamente cu Impact Hub Aruba.
Balor di un empresa ta un topico sumamente interesante den seno di “Entrepreneurship” y den mundo empresarial, unda expertonan den e industria financiero ta amplia riba kico realmente ta e balor di un empresa.
DIARIO a compronde cu e seminario a worde diseña den un formato exclusivo pa asina brinda participantenan informacionnan mas practico y relevante pa sea un start-up, entrepreneur of pa companianan ya caba estableci.
Oradonan distingui na e evento aki ta inclui e conosido accountants; Sr. Edsel Lopez, Managing Partner di PKF Aruba, conhuntamente cu Herbert van Elferen, Partner na PKF Aruba. Nan lo ta e expertonan cu lo elabora riba e aspectonan crucial cu doñonan di compania, of professionalnan financiero mester aplica pa ehecuta un valuacion di un compania na un manera mas holistico posibel. Sigur dos experto na Aruba cu 60 aña di experencia combina entre nan, y cu ta worde considera lider den e industria di “Accountancy, Consultancy, Auditing, Corporate Finance y Internal auditing”.
PKF Aruba, ta e prome “Financial Consulting firm” estilo boutique aki na Aruba. PKF ta renombra mundialmente, y PKF Aruba ta prome den Caribe cu a worde funda na Juli 2023, cu servicionan financiero inovativo pa e mercado di Aruba y Caribe Hulandes.
Un otro topico relevante cu tin un posicion prominente den maneho di un compania, ta “Corporate Sustainability” y den ki manera un “business model” tradicional por worde transforma pa uno mas sostenibel, creando balor y impacto positivo pa e compania, trahador, economia, sociedad y nos isla. E topico aki lo worde presenta pa Co-founder y General Manager di Impact Hub Aruba, Señora Mary-Ann Falconi. Impact Hub Aruba, ta forma parti di un organizacion global, cu mas di 115 Impact Hub rond di mundo, y a worde funda na Juni 2022. Como un fundacion non-profit, Impact Hub Aruba tin como meta pa sostene y guia entrepreneurship na Aruba y aporta na un economia local mas sostenibel segun un maneho basa riba principionan di “Sustainable Development Goals”.
E seminario lo tuma lugar dia 24 di November 2023 for di 10:30 am te cu 12:00 pm na Impact Hub Aruba cu ta situa den Weststraat na Playa.
