Minister Ursell Arends a anuncia acuerdo di aviacion cu Francia

*Lo facilita transporte aereo entre Francia y Aruba y teritorionan Frances den Caribe

ORANJESTAD (AAN):  Recientemente Aruba a firma un acuerdo di transporte aereo cu Republica Frances. E acuerdo aki a keda conclui y firma na St. Martin, despues di varios luna di deliberacionnan y negociacion. E acuerdo lo facilita transporte aereo entre Francia y Aruba y ta inclui e teritorionan Frances den Caribe.

            Ing. E.F. Kelly, lider di delegacion di Aruba, ta amplia: “E acuerdo aki ta di suma importancia pa Aruba. Manera ta conoci, Aruba su economia tin un grado di dependencia halto for di turismo. E acuerdo aki lo habri caminda pa den futuro por realisa vuelonan transatlantico entre Francia y Aruba. Ademas di esey, e acuerdo aki lo ta un instrumento importante pa mehora conectividad den nos region, mirando cu lo habri porta pa vuelonan entre Aruba y teritorionan Frances den nos region manera Martinique, Guadaloupe y Guyana Frances.

            Esaki lo yuda mitiga desafionan existente di conectividad den e region di Caribe. Nos ta expresa nos aprecio pa e delegacion Frances pa nan bon boluntad y tremendo cooperacion pa por yega na e acuerdo importante aki. Ademas di e acuerdo, nos a haci palabracionnan pa coopera en conhunto riba otro terenonan den aviacion, y di e manera ey fortifica nos mes mutuamente. Nos ta sigur cu e acuerdo aki lo ta instrumental pa trece e pueblonan di Aruba y di Francia ainda mas cerca di otro”.

            Sr. E. Vivet, lider di delegacion Frances: “Nos a reuni cu un team di Aruba hopi profesional. E intercambionan a resulta hopi fructifero. Tin un vision comparti entre e delegacionnan cu e region di caribe ta den necesidad di mas conexion y conectividad.

            Pa incentiva actividad economico, turismo y interaccion social entre nos pueblonan, nos teritorionan ta depende riba vuelonan largo transatlantico, pero tambe riba conectividad regional. P'esey nos a enfoca riba tur dos di e aspectonan aki. E acuerdo cu nos a logra, lo ofrece varios opcion pa aerolineanan di ambos pais, tanto pa vuelonan directo como vuelonan indirecto den un forma balansa y reciprocal. Nos ta convenci cu esaki lo trece oportunidadnan nobo den e conexion entre Aruba y Francia. E acuerdo aki ta realmente un paso padilanti, como tambe un testimonio di amistad entre nos dos paisnan”.

            Minister di Transporte, Sr. Ursell Arends, ta sumamente contento cu e logro aki. Esaki ta implementacion di e vision di Ministerio di Transporte pa crea e infrastructura di acuerdonan di transporte aereo apropia y relevante pa facilita e airlift necesario pa nos turismo y tambe pa incrementa e conectividad den nos region.