A firma Convenio Nacional durante Foro Nacional pa Adulto Mayor

Minister Ursell Arends:

*Inicio pa yega na un structura den cual por hiba un dialogonan continuo 

ORANJESTAD (AN):  Durante ultimo dos dianan, partnernan cu tin interes directo of indirecto den e area di adulto mayor den conhunto cu Gobierno di Aruba representa door di Minister pa Asuntonan di Adulto Mayor, Minister Ursell Arends, a dicidi pa traha hunto pa desaroya, formalisa y ehecuta den dialogo un plan di maneho duradero cu tin como enfoke principal e bienestar general di adulto mayor na Aruba.

            E convenio nacional ta e inicio pa yega na un structura den cual por hiba un dialogonan continuo na un forma organisa y transparente, na unda por comparti y coordina informacion esencial riba tema di adulto mayor.

             E topiconan principal cu a forma parti di e convenio nacional ta:

- Condicion di bida y vivienda adecuado.

- Investigacion.

- Financiamento.

- Normanan di calidad.

- Accesibilidad na cuido.

- Bienestar general.

- Solidaridad.

- Sostenibilidad y continuidad.

            Minister Arends a informa durante Foro Nacional pa Adulto Mayor cu lo monitorea y evalua e progreso y e efectividad di e acuerdo periodicamente cu asistencia di un comision ehecutivo cu lo raporta na Minister di Asuntonan di Adulto Mayor por escrito, cada kwartaal.

            Foro Nacional pa Adulto Mayor a termina unda e convenio nacional a wordo firma door di, SEPPA, FTA, SIMAR, OPPA, Wit Gele Kruis, KvK, ATIA, FCCA, HOH, ASHA, HAVA, Stichting Cas Marie, SABA, Stichting Alzheimer's Aruba, AHATA, APFA y ATSA.

            Palabra di gradicimento na tur organisacion y e team cu a forma parti di evento importante aki. Tur dos dia di Foro Nacional pa Adulto Mayor a wordo transmiti live y por wordo mira bek riba pagina di Facebook di Minister Ursell Arends y Directie Ouderenzaken.

            "Nos ta tende y experiencia cu den hopi famia e rol principal di nos grandinan ta pa fungi como e lijm den e famia, e punto central, y awe e Adulto Mayor ta fungi como e lijm den nos comunidad." - Minister Ursell Arends