ORANJESTAD (AAN) – Minister Ursel Arends, titular di Transporte, Integridad, Naturaleza y Asuntonan di Adulto Mayor,
a hiba palabra durante e conferencia di prensa cu a tuma lugar na Santa Rosa, relaciona cu e lanzamento di e campaña di concientizacion “Food Security”.
E dignatario, cu ta encarga cu Sector Primario, a expresa cu e dia aki tabata hopi special, pasobra tabata Dia di Mama Tera, y tabata un honor pe pa lanza e campaña. El a gradici señora Nathalie Maduro y tambe señora Zulema Erasmus, pa lidera e proyecto aki.
El a subraya cu pa loke ta trata Ministerio di Naturaleza di cual agricultura, cria y pesca ta forma parti, ta mira den dje como un posibilidad economico cu tin oportunidadnan grandi pa Aruba.
E mandatario aki a indica cu e proyecto aki no ta toca solamente su ministerio, pero e ta den colaboracion estrecho cu Ministerio di Economia tambe. Cu otro palabra, e ta un proyecto inter-ministerial y di e forma aki nan ta haci esaki posible y el a extende palabra di gradicimento na Minister Wever, titular di Economia.
Minister Arends a expresa cu e compromiso ta pa sigui engrandece e industria di agricultura di Aruba, y e compromiso di ministerio di naturaleza ta pa e aña aki presenta e gap y e GIMP pa tambe nan por yuda pusha y haya e certificacion cu tanto e agricultornan ta desea.
Un par di siman pasa, e dignatario a bisa, e tabata tin e honor hunto cu Santa Rosa, di reconoce e agricultor hoben di aña y e ta mira cu e aña aki mas y mas industria ta desaroya. E ta sinti cu “food security” ta un tema cu cada dia ta wordo toca mas den e comunidad.
Arends a agrega cu hunto cu Santa Rosa y Departamento di Asuntonan Economico, Comercio y Industria, tabata un honor pa su persona di por a lanza e campaña di concientizacion aki, y asina brinda informacion y sigui duna empuhe na tur e agricultornan. Hunto nan ta bay engrandece y stimula e sector aki, pa e bira un sector economico nobo cu Aruba por depende di dje.
