ORANJESTAD (AAN): Riba Dia di Planeta Tera, Aruba Hotel & Tourism Association a entrega un donacion na “Ban Lanta y Planta”.
Cu e gesto financiero, AHATA ta gradici e voluntarionan dedica na planta mata indigeno na diferente localidad na Aruba.
CEO di AHATA, Tisa LaSorte, a haci entrega di un donacion na Presidente di Ban Lanta y Planta, Señora Anita Aerts y miembro di e committee, Sr. Roy Maduro, pa apoya nan proyectonan y yuda enfatisa e necesidad di planta y cuida mata. Mata ta crea oxigeno, ta duna nos sombra, y ta embeyece nos isla.
Ora un hende planta mata e ta yuda mitiga e daño cu e persona mes ta causa na nos medio ambiente pa medio di consumo diario.
AHATA ta spera cu Aruba progresa den esfuersonan pa proteha nos medio ambiente y cu un y tur ta planta y cuida mata.
