Bloki hunto cu plafon a bin abao net dilanti loket di Opname den Hospital

Trahadornan a core sali di Hospital bao protesta!

ORANJESTAD (AAN): Un momento di panico a presenta su mes Diabierna mainta na Hospital di Aruba, ora cu tanto empleadonan, enfermeronan, y tambe pashentnan a tende un desordo di otro mundo.

   Esaki a bin for di e area di Opname di Hospital unda pashentnan cu ta bay wordo interna tin di acudi, esta esun cu tin banda di e entrada unda pashentnan por bay pa haci Areglo di Pago di e piso mas abao di Hospital.

   Un pida grandi di plafon a basha bin abao, incluyendo lighthousing, y hunto cune pida bloki di cement, y varios pida di concrete a basha bin abao cune.  Pa puro suerte, e momento ey no tabatin ningun pashent of personal para dilanti e loket di Opname.

   Algun hende a splica cu for di Diamars caba, trabao di construccion ta andando na parti ariba di e seccion di Opname aki.  Por tende desordo di otro mundo tur e dianan ey di e.o. contratista haciendo uso di Hammer Drill Heavy Duty cu ta laga tur e area keda tril.

   President di Sindicato ABV, esta Gina Maduro, a confirma cu di comienzo di siman tin trabao andando net riba Opname.  Cada biaha pida garnachi di cement tabata bin abao, y trahadornan ya caba a notifica nan Sindicato cu nan ta sinti nan mes hopi unsafe eynan.

   Pues di comienzo di siman caba mesora nan a notifica Raad van Bestuur di Hospital di e peligro, y esaki na su turno a pidi Fundacion SOGA pa por fabor stop cu e construccion un rato, pa duna un chens na e Departamento pa nan muda, pa asina nan por sigui cu e trabao.

   Pero parce cu SOGA no tin hopi poder riba e Contratista, y ABV a nota cu Hospital na Aruba aworaki no por garantiza seguridad ni di pashent y ni di e trahadornan den e area aki di Opname.

   A pidi pa stop cu e trabao, pero Contratista a sigui numa!  Y Diabierna mainta e situacion peligroso y di panico a socede, ora cu plafon cu bloki a basha bin abao.  Por  a mira con hasta ducto di airco a keda colga den halto, y casi esakinan tambe a bin abao.

   “Awor nos a bisa cu ta basta, pasobra nan no por garantiza seguridad pa trahadornan,” Maduro di ABV a bisa.  El a agrega cu nan trahadornan ta laborando bao di un stress, como cu nan tin un trabao hopi responsable di atende cifra y informacion constant di pashent, pero cu e temor cu cualkier rato un bloki ta sali cay for di halto.

   Diabierna mainta ora cu e caso aki a socede, Sindicato ABV a core ordena e trahadornan laborando den e seccion ey di Opname, pa nan sali pafor di e edificio unda nan ta safe.

   “Pesey nos a bisa cu ta basta!  Nos a saca nos trahadornan un rato pa mustra nos malcontento di e construccion aki,” Gina Maduro di ABV a declara.

   Nan ta contento cu Directiva di Hospital si a mira e red flag for di comienzo di siman, y a core bati alarma pidiendo SOGA pa pidi e contratista wanta un rato.

   Pero ABV ta asombra cu SOGA no tin ningun poder di duna ordo riba e Contratista!

   E Contratista a sigui haci cobamento den muraya cu e Hammer Drill Heavy Duty strobando tur hende eyden di haci nan trabao.

   “Nos no por sigui den circunstancia asina, y esaki ta loke ta pasando,” Maduro a agrega.

   Sindicato ABV a bisa cu nan ta defende nan miembronan cu tabata laborando den e area, sintiendo nan mes asina insigur, y pesey Diabierna a dicidi na saca nan pafo.

   No ta conoci con halto e nivel di desordo den Decibel (dB) ta cu por ta dañino pa oido di hende.  Pero Gina Maduro a confirma cu cada rato piedra y chips di cement ta cay bin abao, y Diabierna mainta un bloki grandi a basha plafon bin cune.

   Segun ABV, e Contratista no tin OK ainda pa traha riba e piso eyriba!  Pasobra nan tin di duna un chens na e Departamento bao di dje muda pa asina por haya luz berde pa cuminza haci trabao.

   DIARIO a compronde cu Diabierna atardi, Hospital a anuncia cu temporalmente e seccion di Opname a muda pa e edificio nobo blanco grandi di Medical Office Building.