Minister Tjon a felicita tur Cuidador di Preso riba nan dia

ORANJESTAD (AAN): Diasabra a celebra e dia di e cuidadornan di preso, "bewaardersdag". Un palabra di felicitacion ta bay pa tur personal na KIA, cu ta percura pa e cuido y seguridad di nos presonan.

E trabou cu e trahadornan di prison ta eherce ta uno hopi importante den e cadena Hudicial. Nos sistema hudicial ta funciona danki na boso trabou. 

Boso trabou no ta solamente encera e cuido di e presonan, pero tambe percura cu presonan por re-integra y re-socialisa bek den nos comunidad.

E importancia di esaki ta papia pa su mes, pasobra di e forma aki por baha recidivismo y obviamente tambe gasto di pais Aruba.

Y boso ta haci tur esaki bou circumstancianan extraordinario. Un pabien grandi riba boso dia y sa cu nos ta aprecia e trabou cu boso ta eherce, asina Minister di Husticia Rocco Tjon a expresa.