A comparti vision y meta pa futuro di deporte na Aruba
ORANJESTAC (AAN): Minister di Enseñansa y Deporte Endy Croes tin un solo meta, pa mehora enseñansa di Aruba y tambe e deporte di Aruba. Riba diadomingo e mandatario a invita Sidney Ponson Charity Foundation pa reuni y pa intercambia pensamentonan riba e proyecto grandi na Bubali cu e fundacion tin pa nos muchanan y hobenan.
Tambe a elabora riba e tremendo 'Wahoo Shootout' cu lo tuma luga proximamente 4 di december 2021. Sidney Ponson Charity Foundation ta sumamente contento cu e mandatario a mustra su gratitud y sosten pa ayudo pa cu e evento y proyectonan cu ta na caminda.
Tambe e mandatario a intercambia ideanan y pensamentonan deportivo pa futuro con Sidney Ponson Charity Foundation y Ministerio di Deporte por traha hunto na bienestar di deporte den su totalidad.
E reunion a bay den un bon ambiente unda cu a mandatario a mustra su vision pa deporte di Aruba y tambe e conocido pelotero Sidney Ponson a mustra su plannan cu e tin pa yuda e desaroyo di deporte na Aruba.
For di ambos banda ta mustra mas cu dispuesto pa traha hunto pa un solo meta cu ta deporte di Aruba y nos muchanan y hobenan di Aruba, pa sigui den e bon caminda pa nan tin un deporte pa motiva y yudanan sigui crece y desaroya.
Sidney Ponson Charity Foundation ta gradici Minister Endy Croes pa a habri su portanan riba un diadomingo atardi y asina mustra cu deporte no tin dia ni ora. Tambe Sidney Ponson ta gradici Milton Croes cu a join den e reunion cu ta mustra un biaha mas e vision pa traha hunto, y cu kier mehora deporte den su totalidad aki na Aruba.
