Minister Rocco Tjon a reitera:
*KPA ta bay reorganiza y e proceso a inicia caba hunto cu DRH
ORANJESTAD (AAN) – Minister di Husticia, señor Rocco Tjon, a menciona den un entrevista cu DIARIO, cu e ta na haltura di e preocupacion cu tin cerca Vereniging Rijscholen Aruba (VRA), nan ta señala diferente punto.
E dignatario a bisa cu pa e solucion na largo plazo el a reuni cu VRA algun siman atras, y a splica nan tocante e plannan cu tin riba mesa pa cu Bureau Examen Rijbewijs (BER) den su totalidad y nan ta na haltura di dje.
E mandatario a amplia su informacion bisando cu Cuerpo Policial (KPA) ta bay reorganiza y esey a cuminza hunto cu e Departamento di Recurso Humano. El a menciona cu por mira den e “possession paper” tambe di Alto Comisario, e ta papia cla cu KPA kier bay enfoca riba nan “court business”, kiermen su tareanan primordial, y un di nan no ta mas pa encarga cu e parti di examen rijbewijs tambe.
“E reorganizacion aki nos kier finalize e aña aki, y den e organizacion nobo di Cuerpo Policial e tarea aki no ta bay ta mas pa KPA y VRA tambe ta informa tocante esaki”, Tjon a reitera.
El a sigui bisa cu obviamente, den e proceso aki lo por bay wak tur e tareanan y procesonan di trabao nobo tambe, pa cu e entidad cu ta bay ta encarga cu e parti di rijbewijs.
Minister Tjon a agrega cu tin e parti na corto plazo tambe. E ta na haltura di e preocupacionnan cu VRA a carga den nan reunion cu su persona, pero tambe den nan carta di dia 7 di Maart, y ya caba el a informa KPA di e puntonan di preocupacion aki, entre otro e covid beleid, por ehempel, cu por cierto tin su puntonan positivo tambe, e dignatario a acentua, ya cu tin procesonan flexibiliza y aworaki ta digital, y no ta mas en persona, cu ta desaroyonan positivo, pero obviamente ta puntonan cu mester atende cune, Minister di Husticia a indica.
Minister di Husticia a aclarea cu esaki ta puntonan cu no ta regarda su ministerio, sino cu ta algo entre KPA y VRA y logicamente su ministerio lo monitorea e desaroyonan aki, pa na final di dia por yega na un solucion cu ta cumbini ambos partido.
