ORANJESTAD (AAN) – Gobierno a yama un conferencia di prensa Diabierna, pa update e ultimo desaroyonan di e pandemia di Covid-19 riba na Aruba y pone enfasis riba
e vacunathon cu lo tuma lugar Diasabra awo y Diadomingo.
Minister di Turismo, Salud Publico y Deporte, Dangui Oduber, a hiba palabra y na prome lugar a splica cu pa duna un extra push, na e proceso di vacunacion, a organiza un vacunathon e fin di siman aki, pa yega mas cerca di e meta cu gobierno a pone, ora nan a cuminza cu e programa di vacunacion den Luna di Februari.
“Te na e momentonan aki nos tin mas di 45 mil persona, ya caba esnan riba 60 aña nos ta den un porcentahe di mas di 70%, locual ta hopi bon pasobra esaki ta e grupo vulnerable cu nos kier proteha prome y cu segun estadisticanan ta esun cu ta wordo hospitaliza mas frecuente. Nos a percura pa presenta e solucion y nos ta contento cu nos grandinan a haci uso di e solucion aki, di bay vacuna”, Minister a bisa.
El a agrega cu ainda falta algun mil persona pa cumpli cu e meta di a vacuna mayoria di esnan 60 plus.
E mandatario ta satisfecho di wak cu e comunidad ta respondiendo y ta yegando casi 53 mil persona cu a registra pa haya e vacuna, y ta importante pa comunidad responde na e vacunathon e fin di siman aki.
E motibo pa bin cu e dos dianan aki, di vacunacion nacional, ta pa logra vacuna entre 10 mil pa 15 mil persona den dos dia, y di e forma ey yega mas cerca di e meta cu gobierno a pone su dilanti, e dignatario a reitera.
E dignatario a referi na e informacion cu Minister Presidente a duna den e conferencia di prensa aki, tocante e posibilidad pa cuminza suaviza e medidanan, y den e cuadro aki ta hopi importante pa bay tuma e vacuna.
Manera ta conoci lo bay tin e siguiente cuater localidadnan pa prik e fin di siman aki: e ballroom di Ritz Carlton, Club don Bosco na Noord, Centro Libertador Betico Croes na Santa Cruz, y tambe Teresita Center na San Nicolas.
Lo cuminza suministra e vacuna for di 9 or di mainta te 5 or di atardi. E mandatario a bisa cu esaki ta un esfuerzo di sector publico y sector priva.
“Como Minister di Salud mi kier a gradici tur e partnernan pa duna e cooperacion necesario pa den union nos por purba di logra e meta cu nos a pone nos dilanti e fin di siman aki. Nos a haya bon cooperacion di Departamentonan di Gobierno, manera DVG, Bureau Rampenbestrijding, DOW, KPA, VDA, ATA, Arubus, FCCA, AZV, SVb y AHATA cu, conhuntamente cu Ritz Carlton, a pone nan ballroom disponible pa nos por a organiza e dianan nacional aki, y varios compania di sector priva, tambe a duna nan contribucion”, e mandatario a bisa.
