Minister Presidente a referi den Parlamento na e rapport forensico di RdA

ORANJESTAD (AAN) – Diaranzon 13 di Mei aki, Minister Presidente Evelyn Wever-Croes a referi den Parlamento, na e rapport forensico di RdA (Refineria di Aruba),

despues di algun siman cu el a entrega esaki na Staten, pa asina scucha di e parlamentarionan kico ta e diferente puntonan cu nan tin, pa gobierno elabora mas riba dje.

Prome Minister a indica cu, basicamente, dos rapport a wordo entrega y tur dos ta den Forensic  Services Caribbean (FSC)  caminda kico a pasa den e refineria y kico por a haya bek despues cu e parti di “I.T” net prome cu mester a entrega e computernan pa e investigacion forensico tuma lugar, a delete e files riba e computer.

“E rapport aki a wordo traha y e investigacion aki a wordo haci, a base di peticion di Parlamento, pa haya un mihor bista, kico ta locual ta sosode den e compania”, e dignatario a splica, y tambe a pidi disculpa cu e rapport aki a tarda asina tanto.

“Y mi ta kere cu awo cu tur e parlamentarionan por a tuma nota di e contenido, por a conclui tambe di con el a tarda asina tanto. Claro, e pandemia ta loke ta haci tarda asina tanto cos y esaki tambe a hunga un rol akinan. Y, e intensidad di e investigacion, unda cu a bay den hopi detaye sin haya cooperacion di esnan envolvi y specialmente, esnan mayormente responsable, cu no kier a duna cooperacion pa duna nan punto di bista”, Premier Wever-Croes a señala.

E mandatario a expresa cu pa un rapport ta responsable mester tin “hoor en Wederhoor”. Kiermen, ora cu ta sospecha di un persona cu por a haci algo, e ta wordo puntra pa e duna su punto di bista, y esey a wordo haci cu por ehemplo, Parlamentario Richard Arends, e tempo ey “director, consehero, y casi doño di e compania” y e no a duna su reaccion, Wever-Croes a remarca.

E dignatario a agrega cu a tuma ocho luna pa Arends duna su reaccion y despues, apenas 22 di Februari, el a duna su di dos reaccion. Despues di esey e rapport a wordo finaliza dentro di un luna.

Minister Presidente a bisa cu e Organizacion RDA ta uno relativamente nobo. El a wordo lanta dia 30 di September 2016, ora cu ya caba tabata tin un negociacion cu Citgo y casi a keda cla.

E ‘Akte van oprichting’ a wordo inscribi na Camara di Comercio dia 13 di October 2016, sinembargo ni un dia a inscribi ken ta e miembronan di e Hunta di Comisario, y esaki ta algo cu como ‘aandeelhouder” e tempo ey Minister Mike de Meza, awo Parlamentario di AVP, cu tabata representa e Shareholders, nunca a zorg pa registra esakinan”, Prome Minister a cuestiona.