ORANJESTAD (AAN): Staatssecretaris di Hulanda, esta Raymond Knops riba Diaranson a manda un informe skerpi pa Prome Ministro Silveria Jacobs di St. Maarten,
esta cu Hulanda lo no pasa e 39 miyon Florin den cuadro di e di cinco tranche di sosten di liquidez, debi na e “situacion hopi preocupante” encuanto corporate governance di Princess Juliana International Airport (PJIA).
Knops a bisa cu e lo no pone su firma pa e placa wordo manda, tanten cu Gobierno di St. Maarten no tuma accion fuerte pa restaura e situacion na Aeropuerto.
Den e carta skerpi aki, Raymond Knops no a djis expresa su preocupacion na Gobierno di e isla encuanto e desaroyonan na Aeropuerto, pero tambe e representante spcial di Hulanda den e proceso di reconstruccion Frans Weekers, tambe Banco Mundial, y Royal Schiphol Group (RSG).
Recien caba DIARIO a publica con Schiphol Group a menaza di lo bula fo’i e proyecto di renobacion aki, si acaso corporate governance no wordo institui bek den e Aeropuerto.
“Tur e advertencianan aki no a yuda cu Gobierno di St. Maarten como accionista di Aeropuerto a tuma accion pa coregi loke a ser haci. Pesey mi tin di conclui cu e dunamento di advertencia y recordatorionan constante ya no ta suficiente pa salvaguardia e recuperacion di Aeropuerto, y mucho menos pa e recuperacion economico di henter e isla,” el a declara.
Segun Knops, e “forma di traha inconfiable” di e Director y dos miembro di Hunta di Supervision di e compania holding di Aeropuerto (PJIAH), tin ‘consecuencianan cada biaha mas negativo pa e ehecucion di e proyecto di reconstruccion y realizacion di bon gobernacion.”
Knops a acusa St. Maarten, cu aunke e isla ta keda enfatiza nan dedicacion pa cu e proyecto di reconstruccion y e mehoramentonan necesario den corporate governance, e desaroyonan den practica ta totalmente contradictorio, y Hulanda no ta mirando hopi accion di Gobierno den e asunto aki.
St. Maarten tabata blo bisa cu e puntonan ey ta djis rumor, y ta keda bisa cu como accionista nan tin di mantene nan distancia. Naturalmente esaki ta corecto, pero den e caso di negligencia mahos asina, y hasta trabao sin confianza di miembronan di directiva manera ta pasando awor na PJIAH, ta keda awor na e accionista pa actua cu man fuerte.
Raymond Knops a remarca cu pa por sigui haya financiamento pa e reconstruccion di Aeropuerto, Gobierno di St. Maarten mester haci lo mihor posible pa sigura bon gobernacion na e Aeropuerto. El a nota cu e promesa aki, cu ta parti tambe di e Landpakket, no a wordo cumpli cune.
Pues pa awor e pago di e di 5 tranche di 39 miyon Florin ta poni on hold, y ta bayendo bek pa wordo discuti den Conseho di Ministro di Reino riba Diabierna 21 di Mei. Knops lo bay pidi pa pospone e pago aki, te ora cu Gobierno di Philipsburg a actua suficientemente cu forza pa structuralmente restaura e problemanan na Aeropuerto y sigura e progreso exitoso di e proyecto pa reconstruccion di e terminal.
Na comienzo di siman venidero, Knops ta bishitando St. Maarten y e ta spera cu Gobierno e ora ey lo presenta un ‘solucion satisfactorio’.
